Մարտի սկզբից պարբերաբար տեղեկացրել ենք ՀՀ Տավուշի եւ Լոռու մարզերում խոզերի աֆրիկյան ժանտախտ հիվանդության տարածման մասին (06.03.2010՝ «Հիմա էլ դասական ժանտախտ», 19.03.2010՝ «Համաճարակ, հաշվառում, փոխհատուցո՞ւմ», 23.03.2010՝ «Ժանտախտը չի նահանջում», 27.03.2010՝ «Ժանտախտը հասավ Լոռի», «Համաճարակը կա՞նգ է առել»): Միայն Տավուշի մարզի Նոյեմբերյանի տարածաշրջանում աֆրիկյան ժանտախտի զոհ է գնացել 349 խոզ, որից 41-ը սատկել է, մնացածը՝ հարկադիր ոչնչացվել: Լոռու մարզի գյուղացիներն էլ էին պնդում, որ իրենց խոզերը սատկել են, սակայն որեւէ փաստաթուղթ չէին ներկայացրել:
Եվ ահա ապրիլի 26-ին Իջեւան քաղաքում բացահայտվել է աֆրիկյան ժանտախտով հիվանդ մի խոզ, որը հարկադիր ոչնչացվել է: Սննդամթերքի անվտանգության եւ անասնաբուժական պետական տեսչության Տավուշի մարզային կենտրոնի անասնաբուժության բաժնի գլխավոր մասնագետ Նորիկ Գիշյանի վկայությամբ՝ Նոյեմբերյանի տարածաշրջանում խոզերի աֆրիկյան ժանտախտի վերջին դեպքը եղել է ապրիլի 5-ին՝ Բերդավանում:
