Երկուշաբթի օրը Ադրբեջանի մայրաքաղաքում ոստիկանությունը ցրել է «Ազադլըգ» («Ազատություն») ընդդիմադիր դաշինքի ակտիվիստների ցույցը՝ Բաքվի քաղաքապետարանի շենքի մոտ: Ինչպես փոխանցում է «Ազատություն» ռ/կ-ն, ցույցի մասնակիցները պատրաստվում էին հավաքների ազատության երաշխիքներ պահանջել՝ նոյեմբերին նշանակված խորհրդարանական ընտրություններին ընդառաջ: Ոստիկանության ներկայացուցիչներն ու քաղաքացիական հագուստով որոշ անձինք, սակայն, թույլ չեն տվել ընդդիմադիրներին հավաքվել քաղաքապետարանի շենքի մոտ: Նրանց ոչ մեծ խմբերով տարել են անհայտ ուղղությամբ:
Ընդդիմության տվյալներով, ձերբակալվել է մոտ 50 մարդ, այդ թվում՝ երկու լրագրող: Ոստիկանությունը հաղորդում է 30 բերման ենթարկվածների մասին՝ իր գործողությունները բացատրելով, թե ցույցը չի արտոնվել քաղաքային իշխանությունների կողմից: Բաքվի քաղաքապետարանը արդեն 3-րդ տարին է, որ չի արտոնում ընդդիմության ցույցերը քաղաքապետարանի շենքի մոտ՝ փոխարենը առաջարկելով դրանք անցկացնել քաղաքի ծայրամասերում:
