![\"\"](\"https://www.aravot.am/2010/aravot_arm/April/23/p22.jpg\")
«Ռեինկարնացիա» խումբը հայկական առաջին եւ դեռեւս միակ ռեգի խումբն է, որը կազմավորվելով 2000 թվականին, իր գործունեության սկզբնական շրջանում հանդես էր գալիս որպես ռոք խումբ:
2007 թվականին, համալրելով կազմը նոր երաժիշտներով, «Ռեինկարնացիան» բռնեց նոր երաժշտական ուղղություն՝ ռեգի ոճը:
Օրերս «Mezzo» ակումբում «Ռեինկարնացիա» խմբի ղեկավար, վոկալիստ եւ կիթառահար Ռոլանդ Գասպարյանը եւ խմբի մենեջեր Արամ Սուջյանը ներկայացրին իրենց նոր ձայնասկավառակը, որ կոչվում է «Մի գդալ սեր»: Այն ձայնագրվել է «S\’Harmony» ստուդիայում: Ձայնասկավառակում զետեղված է 11 երգ, որոնց հեղինակը Ռոլանդն է:
«Մի գդալ սեր» երգի հիման վրա «Ռեինկարնացիան» նկարահանել է տեսահոլովակ: Հաշված օրերի ընթացքում այն կհանձնվի հեռուստադիտողի դատին: Տեսահոլովակի ռեժիսորը Հրանտ Երիցկինյանն է: Ռ. Գասպարյանի խոսքերով, «Ռեինկարնացիայի» համար սկզբունքային է ուրիշի երգ չկատարելը: Դա նույնն է, թե ուրիշի կնոջը տուն բերես»:
«Ձայնասկավառակում տեղ են գտել նաեւ այնպիսի երգեր, որոնցում բարձրաձայնում ենք սոցիալական թեմաներ»,- ասում է երաժիշտը: Հարցին՝ արդյո՞ք երաժիշտները ընդունում են կորպորատիվ միջոցառումների մասնակցության հրավերներ, խմբի մենեջեր Արամ Սուջյանն ասաց՝ չենք մերժում, բայց թելադրում ենք խաղի մեր կանոնները: Կանոններից առաջինը՝ լավ տեխնիկայով ապահովելն է: Ռ. Գասպարյանն էլ հավելեց, որ առաջիկայում «Մի գդալ սեր» ալբոմից մի քանի երգ կթարգմանվի անգլերեն եւ կձայնագրվի Միացյալ Նահանգներում՝ ամերիկացի ռեփերների հետ համատեղ:
Ըստ նրա, հայկական ռեգին ամենուր հաջողություն ունի: Գրավականը, ըստ Ռոլանդի, անկեղծ ու պարզ լինելն է: Ամռանն էլ «Ռեինկարնացիան» մեծ համերգ կունենա Երեւանում, կմասնակցեն նաեւ աշխարհի տարբեր անկյուններից ժամանած երաժիշտներ, որոնք եւս ստեղծագործում են ռեգի ոճում:
