Էյլաթ քաղաքը, որտեղ գտնվում է Կարմիր ծովում իսրայելական հայտնի ծովափը, Հորդանանի տարածքից հինգշաբթի օրը ենթարկվել է հրթիռակոծության: «Ինտերֆաքսի» փոխանցմամբ, ահաբեկիչները քաղաքի ուղղությամբ արձակել են ամենաքիչը երկու հրթիռ, որոնք պայթել են ծովափի շրջանում: «Newsru-Israel»-ի մատուցմամբ էլ, հրթիռներից մեկը հասել է նաեւ Իսրայելի տարածք եւ պայթել Ակաբի արդյունաբերական գոտում: Տուժածների մասին, սակայն, տեղեկություններ չեն հաղորդվում: Այլ աղբյուրների տվյալներով, հրթիռակոծումը իրականացվել է Եգիպտոսի տարածքից եւ հրթիռներից մեկը պայթել է Տաբա քաղաքի սահմաններում:
Իսրայելի անվտանգության ուժերը Հորդանանի իրենց գործընկերների հետ միասին միջադեպի առնչությամբ հետաքննություն են սկսել: Ի թիվս այլ վարկածների, հետաքննվում է նաեւ այն տարբերակը, ըստ որի՝ հրթիռն արձակվել է Եգիպտոսի Սինայի թերակղզուց եւ թիրախը եղել է հենց Էյլաթը: Ե՛վ Հորդանանը, ե՛ւ Եգիպտոսն արդեն հերքել են իրենց տարածքներից հրթիռակոծման մասին տեղեկությունը:
