Ուկրաինան դարձավ ոչ թե ֆորպոստ, այլ՝ «ռազմավարական ճորտ»

Ռուսաստանի եւ Ուկրաինայի նախագահներ Դմիտրի Մեդվեդեւի եւ Վիկտոր Յանուկովիչի միջեւ օրեր առաջ գազի մատակարարման գնի զեղչերի եւ Ստավրոպոլում ռուսական Սեւծովյան նավատորմի ներկայության շուրջ ստորագրված համաձայնագիրը կարող է ուկրաինական հասարակության ներսում ճաքեր առաջացնի եւ ընդդիմությանը համախմբող ազդակ դառնա: «Newsru»-ի մատուցմամբ, նման կարծիք հայտնում են ե՛ւ ռուս, ե՛ւ ուկրաինացի վերլուծաբանները: Հիշեցնենք, որ Ուկրաինան առաջիկա 10 տարիների ընթացքում ռուսական գազի դիմաց 30 տոկոս զեղչով վճարման համաձայնություն է ձեռք բերել: Ըստ համաձայնագրի, գազի գնի հաշվարկման բանաձեւը մնում է նույնը, բայց չեղյալ է համարվում տուգանքների համակարգը: 2010-ին Ռուսաստանը Ուկրաինային 30 մլրդ խմ, իսկ 2011-2019թթ.-երին՝ 40 մլրդ խմ գազ կմատակարարի՝ զեղչված գներով: Դրա շնորհիվ Ուկրաինան այս տարի կտնտեսի $3 մլրդ, իսկ 2011-ին՝ $4 մլրդ: Փոխարենը դրանից որոշակիորեն կտուժի ՌԴ բյուջեն: Ռուսաստանի պետբյուջետի վնասը առաջիկա 10 տարիներին կկազմի $40 մլրդ, բայց, փորձագետների ասելով, այդ կորուստները կփոխհատուցվեն 2017թ.-ից հետո, գազի գնի զեղչերը կհաշվարկվեն Սեւծովյան ռազմական հենակետի վարձակալության գումարից: Հիշեցնենք, որ զեղչված գներով գազ ստանալու փոխարեն Ուկրաինան ռուսական կողմին խոստացել է երկարաձգել Ղրիմում Սեւծովյան նավատորմի ներկայության ժամկետը, որը սպառվում է 2017թ.-ին, եւս 25 տարով՝ մինչեւ 2042-ը: Ավելին, երկկողմ պայմանավորվածության համաձայն, այդ 25 տարի ժամկետը սպառվելուց հետո էլ, եթե որեւէ այլ որոշում չընդունվի, ռուսական նավատորմը Ստավրոպոլում կմնա եւս 5 տարի:

Ուկրաինայում արդեն սպասում են կնքված պայմանագրից դժգոհ ուկրաինացի ազգայնականների բողոքի ակցիաներին: APA-ի մատուցմամբ, երկրի նախկին նախագահ Վիկտոր Յուշչենկոյի գլխավորած «Մեր Ուկրաինան» կուսակցությունը պահանջում է գործող նախագահի իմպիչմենտի գործընթաց սկսել: Այդ կուսակցության տարածած հայտարարության մեջ ասված է, թե՝ գործող իշխանությունը ռուսիֆիկացիայի եւ ազգային շահերի ոտնահարման հստակ ուղեգիծ է իրականացնում. «Ռուսիֆիկացվում է տեղեկատվական տարածքը, վերանայվում են պատմական հիշողության վերականգնման ուղղությամբ ձեռքբերումները, երկրի ազգային շահերին ջախջախիչ հարված է հասցնում Ուկրաինայում ՌԴ Սեւծովյան նավատորմի ներկայությունը 25 տարով երկարաձգելու մասին համաձայնագրի ստորագրումը: Ակնհայտ է, որ Յանուկովիչի թիմը պատրաստվում է ռուսներին հանձնել նաեւ Ուկրաինայի վերջին ռազմավարական ռեսուրսները՝ ավիաարդյունաբերությունը, ատոմային էներգետիկան եւ գազի ստորգետնյա պահեստները: Ցավոք, Յանուկովիչը Մոսկվայի հետ հարաբերություններում Խարկովում «ռազմավարական գործընկերությունից» միանգամից անցում կատարեց «ռազմավարական ճորտի» մակարդակ»: