Տեղեկացրել ենք, որ ՀՀ Սփյուռքի նախարարության նախաձեռնությամբ՝ ապրիլի 25-26-ին Երեւանում կանցկացվի «Հայ ինքնության որակների պահպանումը խառնամուսնություններում» գիտագործնական համաժողով:
ՀՀ Սփյուռքի նախարարության հայրենադարձության եւ հետազոտությունների վարչության պետ Արման Եղիազարյանից տեղեկացանք, որ համաժողովին մասնակցելու են տեղացի եւ Լեհաստանից, Վրաստանից, Ռուսաստանից ժամանած մասնագետներ: Հայտնի է, որ հայկական ամենամեծ գաղթօջախները Ռուսաստանում եւ ԱՄՆ-ում են: ԱՄՆ-ից, սակայն, մասնակիցներ չկան:
Համաժողովը կարող է շատ հարցերի պատասխան տալ: Օրինակ, այս պահին դեռ պարզ չէ, թե որ երկրում ազգությամբ հայ աղջիկների եւ տղաների քանի տոկոսն է կյանքի ընկեր ընտրում օտարազգի մեկին, պարզ չէ, թե որ երկրում է մերոնց շրջանում առավել տարածված օտարազգի տղային, որ երկրում՝ օտարազգի աղջկան նախապատվություն տալը: Պարզ է, որ Ռուսաստանում ավելի հաճախ հայ տղաներն են ամուսնանում ռուսի կամ այլ ազգի ներկայացուցչի հետ, քան հայ աղջիկները:
Երկօրյա համաժողովի ընթացքում հետաքրքիր ելույթներ են լինելու: ՀՀ ԳԱԱ պատմության ինստիտուտի դոկտոր Էդուարդ Մելքոնյանը Երեւանից կնայի խառնամուսնություններին եւ հայ ինքնությանը, հայ աշխատանքային միգրանտների շրջանում խառնամուսնություններին կանդրադառնա մեկ այլ պատմաբան՝ Միհրան Գալստյանը: Հայ մնալու գաղտնիքը կբացահայտի Ռուսաստանից՝ Արմեն Ռոնովը, իսկ Մոսկվայի տնտեսագիտության, վիճակագրության եւ տեղեկատվության պետական համալսարանի Երեւանի մասնաճյուղի տնտեսագիտության ամբիոնի վարիչ Եվգենի Պոնոմարյովը բոլորին կասի, թե ինչու է ամուսնացել հայի հետ: Եթե փիլիսոփա Հասմիկ Գեւորգյանը փիլիսոփայորեն է նայելու խառնամուսնություններում ազգայինին եւ համամարդկայինին, ապա Հայաստանի ազգային արխիվի տնօրեն Ամատունի Վիրաբյանը կոնկրետ ներկայացնելու է Խորհրդային Հայաստանի ղեկավարների օտարազգի կանանց եւ մեր հանրապետության հասարակական-քաղաքական կյանքում նրանց դերը:
