Միացյալ Թագավորության ռազմական օբյեկտներում եւ երկրի սահմաններից դուրս ծառայող բրիտանացի զինծառայողների կանայք եւ ընկերուհիները երեկ յուրահատուկ բողոքի ակցիա են անցկացրել՝ օգնելու համար բոլոր նրանց, ովքեր Իրաքում եւ Աֆղանստանում մասնակցել են ռազմական գործողությունների ու վիրավորվել են: Նրանք բարեգործական նպատակով հանգանակություն են կատարել՝ օրացույցի համար մերկ լուսանկարվելով: Օրացույցի վաճառքից արդեն ստացվել է 26 հազար ֆունտ ստերլինգ՝ մոտ $40 հազար:
«The Daily Mail»-ի փոխանցմամբ, ֆոտոսեսիա-ակցիային, որն իրականացվել է Հեմփշիրի ռազմական հենակետում եւ ուսումնական նախապատրաստական կենտրոններում, մասնակցել է 50 կին: Ու թեեւ վերջիններս լուսանկարվել են բացարձակապես մերկ վիճակում, այդուհանդերձ, օրացույցներում նրանց լուսանկարներն այնպես են «խմբագրվել», որպեսզի մարմնի ինտիմ հատվածները տեսանելի չլինեն. դրանք ծածկված են եղել տարբեր՝ նույնիսկ ռազմական նշանակության, առարկաներով, որոնք օգտագործվել են ֆոտոսեսիայի ընթացքում:
