Երեկ Երեւանում բացվել է «Կրթությունը Հայաստանում» IX միջազգային ցուցահանդեսը:
Ինչպես, ըստ «Արմինֆոյի», նշել է ՀՀ ԿԳ նախարար Արմեն Աշոտյանը, Հայաստանում հիշյալ ցուցահանդեսի անցկացումն արդեն բարի ավանդույթ է դարձել. «Այն հիանալի հնարավորություն է ընձեռում բուհերին, ինչպես նաեւ կրթական տարբեր ծրագրեր իրականացնող կազմակերպություններին՝ ոչ միայն ներկայացնելու իրենց գործունեության արդյունքները, այլ նաեւ հաստատելու փոխշահավետ համագործակցություն»: Նախարարը ուշադրությունը հրավիրել է այն բանի վրա, որ ներկայումս հանրապետության բարձրագույն ուսումնական հաստատություններում ուսանում է 5500 արտասահմանցի ուսանող, ինչը լավ ցուցանիշ է տարածաշրջանում:
