Հատուկ քննչական ծառայությունը հարուցել էր քրեական գործ՝ Սամվել Անդիկյանի եւ Գագիկ Հակոբյանի նկատմամբ:
Սամվել Անդիկյանը եղել է ՀՀ ոստիկանության Անիի բաժնի քրեական հետախուզության բաժանմունքի ավագ օպերլիազորը, իսկ Գագիկ Հակոբյանը՝ Աղին համայնքի ղեկավարը:
Ս. Անդիկյանն իրավունք չուներ զբաղվել ձեռնարկատիրական գործունեությամբ:
Հատուկ քննչական ծառայության տեղեկացմամբ, օպերլիազորը 2007-2008թթ. ընթացքում Շիրակի մարզի Աղին, ապա Բագրավան համայնքների ղեկավարների հետ անհատ ձեռնարկատեր Կառլեն Սարոյանի անունից կնքել է ապրանքանյութական արժեքների փոխանակման պայմանագրեր, Սարոյանից ստացած լիազորագրի հիման վրա՝ իրավասու լինելով անձամբ հանդես գալ որպես պայմանագրի կողմ: Նա, որպեսզի թաքցնի ոստիկանությունում ծառայության հետ անհամատեղելի ձեռնարկատիրական գործունեությամբ զբաղվելու փաստը, պայմանագրերում, հաշիվ-ապրանքագրերում, ինչպես նաեւ կատարողական ակտերում նմանակել ու կեղծել է Կառլեն Սարոյանի ստորագրությունները, եւ այդ կեղծ փաստաթղթերն իրացնելով՝ օգտագործել ու վերը նշված համայնքներում իրականացրել է ոռոգման անօգտագործելի ջրագծերի 15161 գծամետր մետաղյա հին խողովակների ապամոնտաժման աշխատանքներ:
Ստացած խողովակները Ս. Անդիկյանն իրացնում է «Եվրոպա» ՍՊ ընկերությանը, ստանում շահույթ, իսկ հարկային մարմնին՝ ՀՀ կառավարությանն առընթեր պետական եկամուտների կոմիտեի Անիի տարածքային հարկային տեսչությանը, հաշվետվություններ չի ներկայացրել: Ըստ քրեական գործի նյութերի, նա խուսափել է խոշոր չափերի՝ 11 825 317 ՀՀ դրամ հարկերի վճարումից:
Նախաքննության ժամանակ պարզվել էր նաեւ, որ Շիրակի մարզի Աղին համայնքում փաստացի ապամոնտաժված այդ խողովակների ծավալները գերազանցում են նույն համայնքի ղեկավար Գագիկ Հակոբյանի եւ Սամվել Անդիկյանի միջեւ 2007թ. սեպտեմբերի 5-ին կնքված ապրանքանյութական արժեքների փոխանակման պայմանագրում նշված եւ հաշվապահորեն ձեւակերպված ծավալները, ինչը կատարվել է ոչ թե 2007 թվականի ընթացքում Ս. Անդիկյանի, այլ 2009 թ. հոկտեմբեր-նոյեմբեր ամիսների ընթացքում՝ նույն համայնքի ղեկավար Գ. Հակոբյանի կողմից:
Գագիկ Հակոբյանը 2009թ. հոկտեմբեր-նոյեմբերին համայնքի գազիֆիկացման աշխատանքներն իրականացնող «Արտինժեներինգ» ՍՊ շինարարական կազմակերպությանը հենասյուներ տրամադրելու պատրվակով, առանց հարցը համայնքի ավագանու քննարկմանը ներկայացնելու եւ վերջինիս համաձայնությունը ստանալու, ապամոնտաժել է Շիրակի մարզի Աղին համայնքի հաշվեկշռում գտնվող, որպես համայնքի ղեկավար նրան վստահված 1100 գծամետր տարբեր տրամաչափի ոռոգման անօգտագործելի ջրագծի մետաղյա հին խողովակները, որոնք կանխիկ եղանակով իրացրել է «Զիր բլագ» ՍՊ ընկերությանը, իսկ իրացումից ստացած խոշոր չափի՝ 1 100 000 ՀՀ դրամ գումարը յուրացրել է:
Վերոհիշյալ շինարարական կազմակերպությանը 1900 գծամետր տարբեր տրամաչափերի նախկինում օգտագործված մետաղյա խողովակներ տրամադրելու համար նա 2009թ. հուլիսի 31-ին համայնքի բյուջեից «Զիր բլագ» ՍՊ ընկերության տնօրեն Վախթանգ Դավթյանի հաշվեհամարին է փոխանցում 2 712 499 ՀՀ դրամ գումար, սակայն խողովակներն ստանալուց հետո հայտնաբերելով մոտ 100 գծամետր խողովակի պակասորդ, հետագա օրերին պահանջում ու ստանում է դրան համարժեք զգալի չափի՝ 105 000 ՀՀ դրամ գումար, որը համայնքի բյուջե չի մուտքագրել, այլ պաշտոնեական դիրքն օգտագործելով՝ յուրացրել է:
Տանիք ունենալով ոստիկանության օպերաշխատակցին, գյուղապետը որպես համայնքի ղեկավար եւ միաժամանակ աճուրդի կազմակերպիչ՝ «Տեղական ինքնակառավարման մասին» ՀՀ օրենքի 32-րդ հոդվածի 12-րդ կետով սահմանված կարգով Շիրակի մարզի Աղին համայնքի տարածքում գտնվող ընդհանուր 11.85 հա վարելահողերը ներկայացնում է աճուրդի: 2009թ. հուլիսի 17-ին կայացած աճուրդներից 10-ում նա հաստատում է վերը նշված աճուրդների արդյունքների, ինչպես նաեւ հողամասերն աճուրդով Խաչիկ Հակոբյանին վաճառելու վերաբերյալ 2009թ. հուլիսի 17-ի թիվ 1, 2, 3 եւ 4 արձանագրությունները: 2009թ. հուլիսի 21-ին կայացրած թիվ 5, 6, 7 եւ 8 որոշումներով 10 անուն վարելահողերի սեփականատեր է ճանաչել Խաչիկ Հակոբյանին, ում հետ կնքել է առուծախի պայմանագրեր եւ այն ներկայացրել պետական գրանցման:
Խաչիկ Հակոբյանը վարելահողերը վերավաճառում է երեւանաբնակ Մանուկ Վարանցովի Հովհաննիսյանին:
Սամվել Անդիկյանն ու Գագիկ Հակոբյանն իրենց լիովին մեղավոր են ճանաչել: Վերջինս ամբողջությամբ փոխհատուցել է համայնքի բյուջեին պատճառված նյութական վնասը եւ ընդունել է, որ համայնքի բյուջե մուտք չի արել «Զիր բլագ» ՍՊ ընկերությունից ստացած 105 000 ՀՀ դրամ գումարը: Գ. Հակոբյանն ընդունել է նաեւ 2009թ. հոկտեմբեր-նոյեմբեր ամիսների ընթացքում 1 100 000 ՀՀ դրամ ընդհանուր արժողությամբ համայնքի հաշվեկշռում գտնվող մետաղյա հին խողովակներ ապամոնտաժելու եւ կանխիկ եղանակով «Զիր բլագ» ՍՊ ընկերությանը վաճառելու, վաճառքից գոյացած գումարը յուրացնելու փաստը:
