Վաշինգտոնյան այցից առաջ Սերժ Սարգսյանը Տավուշում, խոսելով հայ-թուրքական հարաբերությունների մասին, հայտարարեց, որ արդեն «մեր որոշումը գրեթե ունենք»: ՀՀԿ փոխնախագահ, ՀՀԿ խմբակցության ղեկավար Գալուստ Սահակյանից «Ա1+»-ը փորձել էր ճշտել՝ ո՞րն է այդ որոշումը: Ի պատասխան՝ պարոն Սահակյանն ասել է. «Մեր քաղաքական օրակարգը շատ հարուստ է, եւ Սերժ Սարգսյանի ասածը վերաբերվում է մեր բոլոր ազգային խնդիրներին»:
Ըստ ՀՀԿ փոխնախագահի, խոսքը ստորագրությունը ետ կանչելու հնարավորության մասին չէ. «Ստորագրությունը ետ կանչելը մեր խնդիրը չէ, բայց նաեւ չենք խուսափում դրանից, բնականաբար: Այն խաղի կանոնները, որ արդեն դիվանագիտական հարաբերություններում թուրքական կողմն իր մուղամն է դարձրել, եւ երբ ուզում է՝ կլկլացնում է, մենք այդքան երկար չենք հանդուրժելու, բնականաբար, բայց այն խնդիրը, որ դրված է մեր առաջ, շարունակելու ենք հետապնդել»:
