Ցուցահանդես եւ համտես տոնի շրջանակներում
![\"\"](\"https://www.aravot.am/2010/aravot_arm/April/20/p20.jpg\")
ԱԳ փոխնախարար Արման Կիրակոսյանը (ձախից),
մշակույթի նախկին նախարար Հովիկ Հովեյանը, նախկին եւ
ներկա փոխնախարարներ Գագիկ Գյուրջյանն ու Սամվել Ավետիսյանը, գրականության ինստիտուտի տնօրեն Ավիկ Իսահակյանը գարեջուր են համտեսում:
![\"\"](\"https://www.aravot.am/2010/aravot_arm/April/20/p21.jpg\")
Հայաստանի ազգային պատկերասրահի տնօրեն Փարավոն Միրզոյանը եւ ՀՀ ճարտարապետների միության նախագահ Մկրտիչ Մինասյանը գիտեն, թե եգիպտական փարավոններն ու հայոց արքաները ինչ են նախընտրել խմել:
![\"\"](\"https://www.aravot.am/2010/aravot_arm/April/20/p22.jpg\")
Մեկ գավաթ գարեջուրը մշակույթի փոխնախարարին հավանաբար գցեց մտատանջությունների գիրկը:
![\"\"](\"https://www.aravot.am/2010/aravot_arm/April/20/p23.jpg\")
«Գիրք» հիմնադրամի նախագահ Ալիս Ադամյանն ու դուստրը՝ նկարչուհի Արեւ Պետրոսյանը լավ խմիչքից չեն հրաժարվի:
Ինչպես արդեն տեղեկացրել ենք, Հուշարձանների եւ տեսարժան վայրերի միջազգային խորհրդի (ԻԿՕՄՕՍ) առաջարկությամբ ՅՈՒՆԵՍԿՕ-ն 1983-ից՝ ապրիլի 18-ը նշում է որպես Հուշարձանների եւ տեսարժան վայրերի միջազգային օր: Այն 2010-ին նշվեց «Գյուղատնտեսական ժառանգություն» խորագրի ներքո: Հայտնել էինք նաեւ, որ հնագիտական հետազոտությունների արդյունքում բացված հնագույն բնակատեղիները թույլ են տալիս Հայաստանը տեսնել որպես երկրագործական մշակույթի առաջացման օրրան ու խաղողի նախահայրենիք:
Կիրակի օրը «Էրեբունի» պատմահնագիտական արգելոց-թանգարանը եւ ԻԿՕՄՕՍ/Հայաստան հ/կ-ն՝ «Երեւանի գարեջուր» ՓԲԸ-ի աջակցությամբ հանդես եկան օրվա խորհուրդը ներկայացնող միջոցառմամբ: Այն բացվեց «Բերդ» պարային համույթի երիտասարդների պարային կատարումներով, ելույթ ունեցան «Էրեբունի» պատմահնագիտական արգելոց-թանգարանի տնօրեն, ԻԿՕՄՕՍ/Հայաստանի նախագահ Գագիկ Գյուրջյանը, ՀՀ ԱԳ նախարարի տեղակալ Արման Կիրակոսյանը, գյուղնախարարի տեղակալ Սամվել Ավետիսյանը, մշակույթի նախարարի տեղակալ Արեւ Սամուելյանը եւ ուրիշներ: Ի դեպ, մշակույթի փոխնախարարը ընդամենը կարդաց մամուլի այն հաղորդագրությունը, որը նախապես ուղարկվել էր ԶԼՄ-ներին: Ներկաներից ոմանք հետաքրքիր փաստերով հավաստիացնում էին Հայաստանի՝ երկրագործական մշակույթի, գարեջրագործության եւ գինեգործության նախահայրենիք լինելու մասին: Օրինակ, Հայաստանի պետական ագրարային համալսարանից՝ Անդրեաս Մելիքյանը հայտնեց, որ հնում ցորենի ու գարու հատիկների միջոցով որոշել են ծնվելիք երեխայի սեռը: Դրանք թրջել են հղի կնոջ մեզով, եւ եթե գարեհատիկն է ծլել, նշանակել է՝ աղջիկ է ծնվելու, ցորենի հատիկի դեպքում էլ՝ տղա:
ԻԿՕՄՕՍ/Հայաստանի գլխավոր քարտուղար Հասմիկ Ազիզյանն էլ մրցանակներ հանձնեց Տուրիզմի հայկական ինստիտուտի 4 ուսանողների, որոնց վստահվել էր ներկայացնել Հայաստանի պատմամշակութային ժառանգությունը ԵԽ հովանու ներքո անցկացվող ամենամյա «Հուշարձանների լուսանկարման միջազգային փորձ» մրցույթին:
Նույն օրը կայացավ նաեւ «Ուրարտուից՝ Երեւանի գարեջուր» խորագիրը կրող ցուցահանդեսի բացումը՝ թանգարանի ժամանակավոր ցուցադրությունների սրահում: Կողք կողքի զետեղված ցուցանմուշների եւ լուսանկարների միջոցով այցելուին ներկայացվեց Հայաստանում գարեջրի արտադրության անցյալն ու ներկան՝ Ուրատուից մինչեւ Երեւանի գարեջուր: Միջոցառումն ավարտվեց թանգարանի ներքին բակում կազմակերպված «Երեւանի գարեջրի» եւ հայկական գինիների այն տեսականու համտեսով, որոնց արտադրությունը խրախուսվել է «Ագրոբիզնեսի եւ գյուղի զարգացման կենտրոնի» կողմից:
