Երեկ Գեղագիտական դաստիարակության ազգային կենտրոնի տնօրեն Լեւոն Իգիթյանն արգելել է գրող-հրապարակախոս Տիգրան Պասկեւիչյանի սցենարով նկարահանված «Ընտրություն» ֆիլմի ցուցադրությունը, որը նախատեսված էր ապրիլի 16-ին: Տնօրենի հետ հանդիպելուց հետո Պասկեւիչյանը պարզել է, որ արգելքը դրվել է կրթության եւ գիտության նախարարության կողմից՝ հղում անելով ՀՀ կառավարության 2002թ. հուլիսի 25-ի N1392-Ն որոշման երրորդ հավելվածին, որն օրինակելի կանոնադրություն է «ՀՀ պետական հանրակրթական ուսումնական հաստատություն» պետական ոչ առեւտրային կազմակերպության համար, իսկ այդ կանոնադրության ընդհանուր դրույթների 9-րդ կետով «հաստատություններում չեն թույլատրվում քաղաքական եւ կրոնական կազմակերպությունների ստեղծումն ու գործունեությունը»։
Տիգրան Պասկեւիչյանը երեկ հայտարարել է, թե՝ «ԿԳՆ-ի դրած ապօրինի արգելքով հեղինակի եւ հրավիրված հանդիսատեսի նկատմամբ խախտվել է ՀՀ Սահմանադրության 27-րդ հոդվածը, որը երաշխավորում է խոսքի, տեղեկություններ եւ գաղափարներ փնտրելու, ստանալու, տարածելու ազատությունը»: Սա Պասկեւիչյանի առաջին ֆիլմը չէ, որ արգելվում է ցուցադրել: Այդպիսի ճակատագրի է արժանացել նաեւ նրա՝ Երեւանի կենտրոնի իրացման մասին պատմող «Օտարում» ֆիլմը, որի ցուցադրումը 2008թ. հոկտեմբերին քաղաքական պատճառներով մերժել էր «Մոսկվա» կինոթատրոնի ղեկավարությունը։ Ընդ որում՝ երկու դեպքում էլ վճարումը երաշխավորվել է։
