Եթե մեր երկրում կեղծված դեղերը վաճառվում են բացեիբաց՝ հենց դեղատան ցուցափեղկում դրված, Եվրամիության երկրներում դեղերի կեղծ շրջանառությունը կատարվում է համացանցի միջոցով: Հայաստանում ինտերնետի միջոցով առեւտուրը դեռ լայն մասսայականություն չի վայելում, բայց եթե կտրականապես արգելվի ու վերահսկվի դեղատներում կեղծ դեղերի վաճառքը, չի բացառվում, որ մեր երկրում դեղ կեղծողները նույնպես ինտերնետի միջոցով կարողանան իրացնել իրենց արտադրանքը: Երեկ Մտավոր սեփականության իրավունքների մասին քննարկման ժամանակ ԵՄ պատվիրակության ղեկավար Ռաուլ դե Լյուցենբերգերն իր մտահոգությունը հայտնեց, որ եվրոպական շուկայում այսօր ինտերնետային ցանցի միջոցով կեղծված դեղորայքի վաճառքի հետ կապված լուրջ խնդիրներ կան: Ըստ բանախոսի, ինտերնետային առեւտրի մասշտաբները բավական մեծ են, եւ հնարավոր չէ դրանց ծավալները ճշգրիտ հաշվարկել:
