Ապրիլի 12-ին ՀՀ քրեական վերաքննիչ դատարանում, Ս. Համբարձումյանի նախագահությամբ, շարունակվեց Բելգիայի քաղաքացի Պերճ Հակոբյանի բողոքի քննությունը: Հիշեցնենք, որ նրան մեղադրանք էր առաջադրվել 1993-ից «զորակոչից խուսափելու» համար, նրանից ապօրինի վերցվել էր 1մլն 800 000 դրամ, հետագայում քրեական գործը կարճվել էր: Նախորդ դատական նիստին դատակոչվել էր պատշաճ ծանուցված հանրապետական զինկոմիսարիատի իրավախորհրդատու Արեն Սարգսյանը:
Բողոքաբեր կողմին, սակայն, հնարավորություն չտրվեց, որպեսզի Արեն Սարգսյանը բացատրություններ տար զորակոչիկի ներկայացուցչի նկատմամբ կամայական մոտեցման, փաստաթղթեր չներկայացնելու հարցին:
Պ. Հակոբյանի ներկայացուցիչ, ԱԺ նախկին պատգամավոր Աղասի Արշակյանը հայտարարեց, որ զինկոմի ներկայացուցիչը պաշտպանության տակ առնվեց դատարանի կողմից: Վերջինիս տեղեկացմամբ, դատարան չբերվեց ապրիլի 29-ի փաստաթուղթը, որով զինակոչիկից գանձվել էր բոլոր 18 զորակոչերի համար տուգանք: Չբերվեց ՊՆ միջգերատեսչական հանձնաժողովի այն որոշման արձանագրությունը, որով 1 մլն 800 000 դրամ տուգանել էին: Պատճառաբանվել էր, թե որպես այդպիսին՝ գոյություն չունի: Այն դեպքում, երբ Ա. Արշակյանի կրկնակի գրավոր պահանջից հետո նրան տրվել էր «գոյություն չունեցող» արձանագրության քաղվածքը:
Զինկոմը ստիպված էր իր ձեռքով վերացնել հուլիսի 3-ով թվագրված նախորդ իր այն հրամանը, որով մերժել էր Պ. Հակոբյանին զինգրքույկ տալ: Սա փոքր հաղթանակ էր: Չպարզաբանվեց, թե ինչո՞ւ են ՊՆ միջգերատեսչական հանձնաժողովի որոշման փոխարեն իրազեկման նամակ տրամադրել կողմին, երբ նամակը գանգատարկելու իրավունք կողմը չունի: Հաջորդ դատական նիստին՝ ապրիլի 19-ին դատարան կներկայացվեն բողոքաբերի նոր միջնորդությունները:
