ՀՀ վարչական դատարանի Գյումրիի նստավայրում երեկ շարունակվեց «Առավոտն» ու ԻԱԿ-ն՝ ընդդեմ Գյումրիի մարզպետարանի, հայցի նախնական քննությունը:
«Առավոտի» շահերի ներկայացուցիչ, փաստաբան Կարեն Մեջլումյանի միջնորդությամբ հայցվոր կողմը բացեց «Առավոտի» էլեկտրոնային հասցեն եւ ապացուցեց, որ 2009 թվականի օգոստոսի 19-ին էլեկտրոնային նամակ-հարցումն ուղարկվել է Շիրակի մարզպետարան: Մարզպետարանի ներկայացուցիչներն էլ պարզաբանեցին, որ տեխնիկական խնդիրների պատճառով 2003 թվականից մարզպետարանի էլեկտրոնային հասցեները չեն աշխատում եւ միայն 2009-ի վերջին մարզպետարանը նոր էլեկտրոնային հասցե է ստացել՝ ՀՀ տարածքային կառավարման նախարարության համակարգում, որով էլ այլեւս աշխատելու են:
Մարզպետարանի ներկայացուցիչները հայցի նախնական քննության ընթացքում նաեւ պատրաստակամություն հայտնեցին «Առավոտին» տրամադրել անհրաժեշտ տեղեկատվությունը, որն ակնկալվել էր ի պատասխան մարզպետարանին ուղղված նամակ-հարցումով: Նկատի ունենալով այս հանգամանքները՝ կողմերը հաշտության համաձայնագիր կնքելու նախնական համաձայնություն ձեռք բերեցին:
