![\"\"](\"https://www.aravot.am/2010/aravot_arm/April/13/p1.jpg\")
Նախորդ շաբաթվա վերջին Ստեփանակերտում կայացած ՀՀ եւ ԼՂՀ կառավարությունների համատեղ նիստի ընթացքում ՀՀ վարչապետ Տիգրան Սարգսյանը, ըստ «Արմինֆոյի», ասել է. «Ես բարձր եմ գնահատում 2009 թվականի ընթացքում ԼՂՀ կառավարության կողմից կատարված աշխատանքը: Չնայած անցյալ տարվա դժվարություններին՝ Ղարաբաղում բոլոր ցուցանիշների գծով լուրջ առաջընթաց է արձանագրվել, եւ դա ոգեւորում է մեզ: Բավականին լուրջ ներուժ է ձեւավորվել նախատեսված բոլոր ծրագրերի իրականացման համար»: Նա նշել է, որ Հայաստանը 2010 թ. առաջին եռամսյակում գրանցել է տնտեսական բարձր ցուցանիշ, որը 2,5 անգամ գերազանցել է ՀՀ կառավարության սպասումները: Ըստ Տիգրան Սարգսյանի՝ դա հնարավոր է դարձել տնտեսական ճգնաժամի պայմաններում ճիշտ տնտեսական քաղաքականություն իրականացնելու շնորհիվ: «Մասնավոր ներդրումների ծավալների նվազման պարագայում Հայաստանի Հանրապետությունը որդեգրեց ընդլայնողական քաղաքականություն: Դրան նպաստեց վերջին տասը տարիների ընթացքում իրականացված մակրոտնտեսական գրագետ քաղաքականությունը»,- ասել է Տիգրան Սարգսյանը:
