Դիտահորերը բաց են, ցուցանակներ չկան

Գեղարքունիքի մարզի Գավառ քաղաքի մի շարք փողոցներ անմխիթար վիճակում են: Այդ փողոցներով երթեւեկելիս վարորդներն ու հետիոտները գերուշադիր պետք է լինեն. ամեն քայլափոխի նրանց սպառնում է ավտոմեքենան ջարդուփշուր անելու կամ ոտք ու ձեռք ջարդելու վտանգը: Անգամ կենտրոնական փողոցներից բացակայում են դիտահորերի կափարիչները: Տեղի բնակիչների խոսքերով, հատկապես ձմռանը, երբ ձյունը փակում է բաց դիտահորերը, շատ մարդիկ են ընկնում փոսը եւ լուրջ վնասվածքներ  ձեռք բերում: Մենք նկատեցինք, թե նման դժբախտ դեպքերից խուսափելու համար որոշ վայրերում ինչպես են գավառեցիները սեփական ուժերով դիտահորերի անցքերը փակել՝ այնտեղ տեղադրելով ավտոմեքենայի անիվների մասեր: Գավառում մեր կատարած փոքրիկ զբոսանքի ժամանակ նաեւ ուշադրություն դարձրինք, որ այս կամ այն փողոցի անվանումը կրող ցուցանակներ էլ չկան: Գավառեցիներն ասացին, որ փողոցների անուններն իրենք էլ ստույգ չգիտեն, քանի որ «դրանք օրը մեկի անունով անվանակոչվում են»: