ՀՀ տնտեսական մրցակցության պաշտպանության պետական հանձնաժողովը թույլատրել է «Ամերիաբանկի» սեփականատեր «Թի Դի Էյ Հոլդինգս Լիմիթեդի» կողմից «Կասկադ բանկի» ձեռքբերման գործարքը: Հանձնաժողովը որոշումը կայացրել է՝ հիմք ընդունելով «Ամերիաբանկի», դրա սեփականատեր «Թի Դի Էյ Հոլդինգս Լիմիթեդ» ՍՊԸ-ի եւ «Կասկադ բանկի» կողմից ներկայացված համակենտրոնացման մասին դիմում-հայտարարագիրը: «Թի Դի Էյ Հոլդինգս Լիմիթեդ» Կիպրոսի Հանրապետության սահմանափակ պատասխանատվությամբ ընկերությունը՝ դիմելով Հանձնաժողով, հայտնել է, որ «Կասկադ բանկի» բաժնետոմսերը ձեռք են բերվելու «Ամերիաբանկի» ավելի քան 99,99 % բաժնետեր «Թի Դի Էյ Հոլդինգս Լիմիթեդի» կողմից (վերջին երկուսը անձանց խումբ է հանդիսանում): Վերոնշյալ գործարքով նախատեսվում է անձանց խմբի կողմից «Կասկադ բանկի» բաժնետոմսերի 100 %-ի ձեռքբերում: Հաշվի առնելով, որ առկա չեն անձանց խմբի եւ «Կասկադ բանկի» համակենտրոնացումն արգելելու վերաբերյալ հանգամանքներ, ՏՄՊՊՀ-ն թույլատրել է «Ամերիաբանկ» -«Թի Դի Էյ Հոլդինգս Լիմիթեդ» անձանց խմբի եւ «Կասկադ բանկ» ընկերության համակենտրոնացումը՝ անձանց խմբի կողմից «Կասկադ բանկի» բաժնետոմսերի 100 %-ի ձեռքբերման միջոցով:
