Դուբայում ընթացող շախմատի միջազգային բաց մրցաշարում հայաստանցի գրոսմայստերներ Տիգրան Քոթանջյանը եւ Հրանտ Մելքումյանը երեք տուրից հետո հարյուր տոկոսանոց արդյունքով առաջատարների շարքում են՝ բաժանելով 1-6-րդ հորիզոնականները:
Տիգրանն իր երրորդ անընդմեջ հաղթանակը տոնեց սեւերով՝ Ադրբեջանի ներկայացուցիչ Գադիր Հուսեյնովի հետ պայքարում, իսկ Հրանտն առավելության հասավ իր հայրենակից Գեւորգ Հարությունյանի նկատմամբ:
Չնայած Նանա Ձագնիձեի (Վրաստան) հետ Գաբրիել Սարգսյանը խաղում էր ապրիլի 7-ին՝ Մայրության եւ գեղեցկության տոնի օրը, սակայն մարզական պայքարի տրամաբանությամբ առաջնորդվելով «ասպետ չգտնվեց»՝ սեւ խաղաքարերով նրան պարտության մատնելով:
Կարեւոր միավոր վաստակեց եւ մրցաշարային աղյուսակում դիրքերը զգալիորեն բարելավեց նաեւ Տիգրան Պետրոսյանը:
Երեկ՝ չորրորդ տուրում, Քոթանջյանը խաղում էր վենեսուելացի Էդուարդո Իտուրիզագայի, Մելքումյանը՝ հնդիկ Հարիկա Դրոնավալիի, Սարգսյանը՝ Բելգիան ներկայացնող Վադիմ Մալախատկոյի, Պետրոսյանը՝ ուկրաինացի Վլադիմիր Գրաբինսկու, իսկ Հարությունյանը՝ Տուրկան Մամեդյարովայի (Ադրբեջան) հետ:
