Հայաստանում, ինչպես եւ ամբողջ աշխարհում, նկատվում է թմրամոլության երիտասարդացում: Երեկ ասել է ՀՀ նարկոլոգիական կենտրոնի տնօրեն, հանրապետության գլխավոր նարկոլոգ Պետրոս Սեմերջյանը: Նրա տվյալներով այսօր ՀՀ-ում գրանցված է 1740 թմրամոլ՝ նախորդ տարվա 1141-ի փոխարեն: Aysor.am-ի փոխանցմամբ, թմրամոլությունը Հայաստանում 50%-ով աճել է, որը, սակայն միայն առողջապահության նախարարության տվյալներն են, այսինքն՝ այն մարդկանց թիվը, ովքեր թեկուզ մեկ անգամ բուժման նպատակով դիմել են ԱՆ նարկոլոգիական ծառայությանը: Պետրոս Սեմերջյանը ներկայացրել է նաեւ տարբեր փորձագետների կողմից մոտավոր հաշվարկված թմրամոլների քանկը՝ 30 000, որոնցից 5-7 հազարը ներերակային ճանապարհով օգտագործում է ծանր թմրամիջոցներ:
«Ընդհանրապես ոչ մի երկրում հնարավոր չէ իմանալ թմրամոլների թիվը, այդ թիվը հաշվում են հատուկ մեթոդներով՝ անուղղակի տվյալները իրար հետ համադրելով»,- ասել է ՀՀ գլխավոր նարկոլոգը: Նա նշեց, որ կանանց շրջանում եւս տարածված է թմրամոլությունը, եւ Հայաստանի նարկոլոգիական կենտրոնում այսօր բուժվում է 12 կին թմրամոլ: Այս թիվը, ըստ բանախոսի, Հայաստանի համար բավականին խոսուն է, քանի որ մի ժամանակ Հայաստանում կին թմրամոլներ չկային:
