«Հայկական ժամանակ» օրաթերթի գլխավոր խմբագիր Նիկոլ Փաշինյանի պաշտպաններ Լուսինե Սահակյանն ու Երվանդ Վարոսյանը երեկ դիմել են ՀՀ Վճռաբեկ դատարանին՝ բողոքարկելով Վերաքննիչ դատարանի որոշումը՝ Փաշինյանի նկատմամբ ընդհանուր իրավասության դատարանի կայացրած վճիռն ուժի մեջ թողնելու մասին: Պաշտպանները Վճռաբեկ դատարանից պահանջել են լիովին արդարացնել իրենց պաշտպանյալին: «Մենք գտնում ենք, որ Նիկոլ Փաշինյանը քրեորեն հետապնդելի որեւէ արարք չի կատարել, եւ խնդրում ենք Վճռաբեկ դատարանից կարճել քրեական գործի վարույթը՝ նրա գործողություններում հանցակազմի բացակայության հիմքով»,- հայտարարել է Լուսինե Սահակյանը: Հիշեցնենք, որ Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Մնացական Մարտիրոսյանը հունվարի 19-ին 7 տարվա ազատազրկման էր դատապարտել Նիկոլ Փաշինյանին՝ 2008թ. մարտի 1-ին զանգվածային անկարգություններ կազմակերպելու մեղադրանքով, իսկ Վերաքննիչ քրեական դատարանը անփոփոխ էր թողել վճիռը՝ միայն համաներում կիրառելով եւ մասամբ կրճատելով պատժաչափը:
