![\"\"](\"https://www.aravot.am/2010/aravot_arm/April/3/p18.jpg\")
Բելգիայի վարչապետի որդին՝ ֆուտբոլային մրցավար, 21-ամյա Թոմաս Լետարմը խաղադաշտում ֆուտբոլիստի հարձակման զոհ է դարձել:
Միջադեպը տեղի է ունեցել Բելգիայի առաջնության երրորդ լիգայի հանդիպումներից մեկի ժամանակ, երբ Թոմաս Լետարմը ֆուտբոլիստներից մեկին կարմիր քարտ է ցույց տվել: Վերջինս, համաձայն չլինելով այդ որոշմանը, բռունցքներով հարձակվել է մրցավարի վրա ու տապալել գազոնին:
Դրանից հետո խաղը դադարեցվել է, իսկ անվտանգության աշխատակիցները հարկադրված են եղել մրցավարին ուղեկցել մինչեւ նրա ավտոմեքենան, քանի որ տրիբունայում գտնվող ֆուտբոլիստի հայրը նույնպես սպառնալից արտահայտություններ է արել նրա հասցեին:
Թոմաս Լետարմը մարմնական թեթեւ վնասվածքներ է ստացել: Իսկ կրքերը զսպել չկարողացած ֆուտբոլիստին դրամական խոշոր տուգանք է սպասվում:
