![\"\"](\"https://www.aravot.am/2010/aravot_arm/April/3/p9.jpg\")
Այս տարի լրանում է Արցախի հռչակավոր Գանձասարի վանական համալիրի Սուրբ Հովհաննես Մկրտիչ եկեղեցու 770-ամյակը: Տարեդարձը նշվելու է բարձր մակարդակով։ Հայ առաքելական եկեղեցու Արցախի թեմից ստացված տեղեկությունների համաձայն, Լեռնային Ղարաբաղի Հանրապետության հոգեւոր ու աշխարհիկ ղեկավարությունը նախատեսում է անցկացնել համերգներ, ցուցահանդեսներ, կրթական հաստատություններում՝ տարբեր ծրագրեր, Արցախի, Հայաստանի ու Սփյուռքի հայագետների, պատմաբանների ու ճարտարապետների մասնակցությամբ գիտաժողով, ուխտագնացություններ: Նախատեսվում է նաեւ նկարահանել ֆիլմ, ստեղծել կայքէջ եւ այլն։ Հուլիսի 11–ին՝ Վարդավառի տոնին, Արցախի թեմի առաջնորդ Պարգեւ սրբազանի ձեռամբ Գանձասարում կմատուցվի տոնական հանդիսավոր Սուրբ պատարագ։ Գանձասարի Սուրբ Հովհաննես Մկրտիչ եկեղեցին կառուցվել է 1216-1238թթ.՝ Արցախի Ներքին Խաչեն գավառի գահերեց իշխան Հասան Ջալալ Դոլայի կողմից։ Եկեղեցու բացումը կատարվել է 1240թ. հուլիսի 22-ին՝ Վարդավառի տոնի օրը։
