Մերկելին չի հաջողվել համոզել Թուրքիային

Թուրքիայի լիարժեք անդամակցությունը Եվրամիությանը նպատակահարմար չէ, սակայն անդամակցության բանակցությունները շարունակվում են։ Այս մասին Անկարա կատարած պաշտոնական այցի շրջանակներում, Թուրքիայի վարչապետ Էրդողանի հետ համատեղ մամուլի ասուլիսի ժամանակ հայտարարել է Գերմանիայի կանցլեր Անգելա Մերկելը: News.am-ի մատուցմամբ, ԵՄ մուտք գործելու գործընթացը արագացնելու համար, Մերկելի խոսքով՝ Անկարան Կիպրոսի հունական հատվածի համար պետք է բացի իր նավահանգիստները եւ օդանավակայանները։ Մերկելը նշել է նաեւ, որ Թուրքիան չպետք է բացասաբար ընկալի ԵՄ լիարժեք անդամակցության փոխարեն «արտոնյալ անդամակցության» առաջարկը։

«Մենք շարունակում ենք բանակցությունները։ Սակայն անհրաժեշտ է, որ Թուրքիան վավերացնի եւ իրագործի Անկարայի արձանագրության կետերը, որով էլ պետք է լուծի Կիպրոսի հարցը»,- ընդգծել է Մերկելը։

BBC-ին իր հերթին հիշեցնում է, որ այդ առաջարկը Թուրքիան մերժել է դեռ 2005թ.-ին՝ համարելով այն «վիրավորական»: Մերկելի եւ Էրդողանի հանդիպման ժամանակ տարաձայնություններ են ի հայտ եկել նաեւ Իրանի հարցի եւ Գերմանիայում թուրք երեխաների համար թուրքերեն լեզվով ուսուցանվող քոլեջի բացման՝ թուրքական նախաձեռնության շուրջ:

Մասնավորապես, Իրանի վերաբերյալ Մերկելը փորձել է հասնել այն բանին, որ Անկարան պաշտպանի Թեհրանի նկատմամբ միջազգային պատժամիջոցների կիրառումը, բայց Էրդողանը դրանք որակել է որպես «հակաարդյունավետ եւ երեսպաշտություն»: Թուրքիան վերջին շրջանում ամրապնդել է իր հարաբերությունները Իրանի հետ եւ հանդես է գալիս այդ երկրի դեմ կոշտ պատժամիջոցներ կիրառելու դեմ: «Մենք մնում ենք այդ տեսակետին, որ պատժամիջոցը առողջ ճանապարհ չէ, եւ լավագույն ելքը դիվանագիտությունն է»,- համատեղ մամուլի ասուլիսի ժամանակ հայտարարել է Էրդողանը:

Աղբյուրը հիշեցնում է, որ Գերմանիան Թուրքիայի ամենախոշոր գործընկերն է, թուրքական տնտեսության մեջ ամենամեծ ներդրումներ անող եւ զբոսաշրջությունից եկամուտներ ապահովող երկիրն է: Գերմանիայում ապրում է մոտ երեք միլիոն թուրք: