Ի պաշտպանություն երեխաների իրավունքների, երեկ Հայաստանում ԵՄ պատվիրակության մեծ դահլիճում ներկայացվել են «Երեխաների թրաֆիքինգը Հայաստանում» հետազոտության արդյունքները: Նպատակն է եղել ուսումնասիրել, թե մեր երկրում երեխաները որքանով են իրազեկված թրաֆիքինգ երեւույթի մասին: Հետազոտությունն իրականացվել է «Ներդաշնակ հասարակություն» սոցիալական աշխատողների ասոցիացիայի կողմից: Ըստ միջոցառման կազմակերպիչների, ուսումնասիրության ժամանակ թրաֆիքինգի դեպքերի հայտնաբերման խնդիր չի դրվել: 1200 տնտեսությունների շրջանում անցկացված հարցումները ցույց են տվել, որ երեխաների թրաֆիքինգի վերաբերյալ բնակչության իրազեկվածության մակարդակը բավականին բարձր է: Թիրախային խմբերի հետ հարցումների արդյունքները ցույց են տվել, որ իրազեկվածության ավելի բարձր ցուցանիշ է արձանագրվել ընդհանուր բնակչության, քան երեխաների շրջանում:
Տնային տնտեսությունում հարցվածների 86.7%-ը լսել երեխաների թրաֆիքինգի մասին, մինչդեռ երեխաների միայն 51.1%-ն էր լսել: Երեխաների իրազեկվածության ամենաբարձր ցուցանիշը արձանագրվել է Երեւանում, ամենացածրը՝ Սյունիքում: Ընդ որում, այդ երեւույթի մասին իրազեկվածության մակարդակի աճը կախված է ընտանիքի ապահովության մակարդակից:
