Ծանր հիվանդությունից հետո 73 տարեկանում կյանքից հեռացավ ՀՀ ԳԱԱ թղթակից-անդամ, պատմական գիտությունների դոկտոր, «ԻԿՕՄՕՍ/Հայաստան» հ/կ-ի անդամ, Հայաստանի հնագիտական ժառանգության ուսումնասիրության նվիրյալ Արամ Քալանթարյանը: ԵՊՀ պատմության ֆակուլտետում ուսումնառությունից անմիջապես հետո (1959թ.) նա զինվորագրվեց Հայաստանի հնագիտական ժառանգության գիտական ուսումնասիրման ու պահպանության խնդիրներին՝ պատմամշակութային ժառանգության բնագավառի շատ ավելի բարդ մի ոլորտ, ուր եւ կերտեց կեսդարյա աշխատանքային կենսագրությունը՝ դառնալով այդ բնագավառի անխոնջ մշակներից ու ճանաչված գիտակներից մեկը: Միաժամանակ, նա գիտնականների այն սերնդի ներկայացուցիչն էր, որին վիճակված էր մշակել պատմության ու մշակույթի հուշարձանների ուսումնասիրման, պահպանության, վերականգնման եւ օգտագործման ժամանակակից գործնական մոտեցումներն ու օրենսդրական շրջանակը՝ 80-ականներից մինչեւ մեր օրերը: Եվ, իհարկե, անվանի գիտնականից զատ՝ դառնալ նաեւ ժառանգության պահապան:
Արամ Քալանթարյան ընկերոջ, գիտնականի, ժառանգության պրոֆեսիոնալի ու նվիրյալի անունն ու ներդրումը իրենց հաստատուն տեղը կզբաղեցնեն Հայաստանի պատմամշակութային ժառանգության պահպանության տարեգրության մեջ:
