Այսօր Հայոց ցեղասպանության թանգարան-ինստիտուտի Կոմիտասի անվան սրահում կկայանա ամերիկահայ գրող Մարգարիտ Աճեմյան-Ահներթի «Դռան թակոցը» հուշագրության շնորհանդեսը՝ հեղինակի մասնակցությամբ:
Գրքի հիմքում հեղինակի մոր՝ 1900թ. Ամասիա քաղաքում (Արեւմտյան Հայաստանի Սեբաստիայի նահանգ) ծնված Եսթեր Միներաճյանի հուշերն են 1915թ. արհավիրքի եւ դրա պատճառած անլուր տառապանքների մասին: Գիրքն անգլերեն լույս է տեսել 2007թ. ԱՄՆ-ում՝ հեղինակին բերելով «Մարդասիրական մրցանակ»: Հեղինակն արժանացել է նաեւ 2008թ. Նյու Յորքի գրքի տոնավաճառի հաղթողի կոչման՝ «Լավագույն պատմական հուշագրություն» անվանակարգում: Մեծ եղեռնի ականատեսի վկայություն հանդիսացող այս հուշագրությունը Հայ օգնության ֆոնդի նախաձեռնությամբ ու հովանավորությամբ թարգմանվել է հայերեն եւ տպագրվել Երեւանում:
Շնորհանդեսի վերջում տեղի կունենա գրքի նվիրատվություն՝ հեղինակի մակագրությամբ:
