Քննաշրջանները ուսանողներից շատերի համար լուրջ փորձություն են դառնում: Ծավալուն առարկան 5 օրում յուրացնելը (խոսքը հատկապես այն ուսանողների մասին է, ովքեր ամեն ինչ փորձում են սովորել վերջին մի քանի օրվա ընթացքում) բավական լուրջ գործ է եւ կարող է ծանր անդրադառնալ օրգանիզմի վրա եւ հանգեցնել լուրջ հետեւանքների: Ի՞նչ է պետք անել: Մեր հարցին պատասխանում է նյարդաբան Արման Հարությունյանը: «Քննությանը նախապատրաստվելու օրերին պարտադիր պետք է ժամանակ հատկացնել ֆիզիկական վարժություններին ու զբոսանքին, ուտել լիարժեք եւ, իհարկե, խուսափել անքուն գիշերներ անցկացնելուց: Չի կարելի որեւէ դեղորայք օգտագործել՝ առանց բժշկի նշանակման: Քննաշրջանից հետո շատ ուսանողների մոտ գերլարված վիճակը որոշ ժամանակ պահպանվում է, բայց չպետք է խուճապի մատնվել. դա շուտով կանցնի»:
Իսկ հոգեբան Նառա Մանյանը խորհուրդ է տալիս տհաճ հետեւանքներից ու հոգեկան սթրեսներից խուսափելու համար՝ քննություններից առաջ չմտածել քննական պրոցեսի մասին, այլ կենտրոնանալ պարապմունքների վրա եւ, ամենակարեւորը, վստահել սեփական կարողություններին ու չվախենալ:
