ՀՀԿ մամուլի խոսնակը հավաստիացնում է, որ Ղարաբաղի հարցում իշխանության դիրքորոշումը երբեք չի փոխվել
![\"\"](\"https://www.aravot.am/2010/aravot_arm/March/27/p5.jpg\")
«Հայաստանն իր առջեւ խնդիր չի դրել ամեն գնով լուծում տալ Լեռնային Ղարաբաղի խնդրին, Հայաստանի համար գերխնդիրը կարգավիճակի ամրագրումն է: Եթե նախկինում հարցի կարգավորման անկյունաքարը տարածքային ամբողջականության սկզբունքն էր, ապա այժմ նույնքան հստակ ամրագրված է ինքնորոշման սկզբունքը»,- երեկ «Դե-ֆակտո» ակումբում մամուլի ասուլիսի ժամանակ հայտարարեց ՀՀԿ մամուլի խոսնակ, ԱԺ ՀՀԿ խմբակցության քարտուղար Էդուարդ Շարմազանովը:
Պարոն Շարմազանովը երեկ նորից հատ-հատ կրկնեց. «Մենք ասել ու ասում ենք՝ Լեռնային Ղարաբաղը չի կարող ունենալ ավելի ցածր կարգավիճակ, քան այսօր, խնդիրը պետք է լուծվի խաղաղ-բանակցային ճանապարհով, մենք չենք ցանկանում պատերազմ, բայց եւ պատերազմից չենք վախենում: Մեկ անգամ եղել է պատերազմ, եւ բոլորը տեսան, թե դա ինչպես ավարտվեց: Մեզ համար ընդունելի է միայն եւ միայն Ղարաբաղի հարցի հայանպաստ լուծումը: Ի վերջո, առանց Ղարաբաղի ժողովրդի, առանց Ղարաբաղի ղեկավարության որեւէ մեկը չի կարող լուծել Ղարաբաղի խնդիրը: Դրա համար Հայաստանի իշխանությունները վերջին շրջանում շատ հստակ եւ շատ արմատական խնդիր են դրել, որպեսզի Լեռնային Ղարաբաղի իշխանությունները մասնակցեն բանակցություններին: Եվս մեկ անգամ ասեմ՝ մեզ համար Ղարաբաղի խնդրի ամեն գնով լուծումը ինքնանպատակ չէ, Ղարաբաղի ժողովուրդը պայքարել է իր աստվածատուր իրավունքի համար՝ ապրել այնպես, ինչպես ինքն է ուզում: Դա բոլոր ժողովուրդների բնական իրավունքն է»: Ըստ պարոն Շարմազանովի, ամբողջ աշխարհն է արդեն տեսնում, որ Լեռնային Ղարաբաղի հարցում «Ադրբեջանը կառուցողական լուծումների պատրաստ չէ»:
Ըստ news.am-ի, Էդվարդ Շարմազանովը հերքել է մամուլում տեղ գտած տեղեկությունը, ըստ որի՝ ՀՀԿ խորհրդի անդամ Վարդան Այվազյանին խիստ նկատողություն է տրվել այն պատճառով, որ նա Գագիկ Ծառուկյան-Ներսես Երիցյան հակամարտության ժամանակ պաշտպանել է ոչ թե ՀՀԿ քվոտայով նախարար դարձած Ներսես Երիցյանին, այլ ԲՀԿ ղեկավար Գագիկ Ծառուկյանին:
Հիշեցնենք, որ Գագիկ Ծառուկյանը էկոնոմիկայի նախարար Ներսես Երիցյանի հասցեին ասել էր, որ նա չի տիրապետում տնտեսական իրավիճակին, որից հետո, ի տարբերություն այլ ՀՀԿ-ականների, Վարդան Այվազյանը նշել էր, որ եթե Ծառուկյանը քննադատել է էկոնոմիկայի նախարարին, ուրեմն դրա համար հիմքեր ունի:
Հարցին՝ եթե դա չի եղել նկատողության պատճառը, ապա ո՞րն է եղել, Շարմազանովը պատասխանել է. «Ուրեմն, կուսակցության կայքէջում կա գործադիր մարմնի որոշումը: Իսկ ինչո՞ւ դուք պետք է մանրամասն իմանաք, թե կուսակցությունը ինչ է արել, ոնց է արել: Դրանք մեր կուսակցության ներքին խնդիրներն են»:
News.am-ը հայտնում է նաեւ. երբ մենք երեկ փորձեցինք Վարդան Այվազյանից պարզել, թե ինչպես է մեկնաբանում ՀՀԿ-ի կողմից նկատողություն ստանալու փաստը, նա արձագանքեց. «Կարո՞ղ եք ինձ հանգիստ թողնել: Ես հիվանդանոցում պառկած եմ»:
