Երեկ Ֆրանսիայի Նիս քաղաքում ավարտվեց շախմատի «Amber» անվանումը կրող ավանդական՝ 19-րդ գերմրցաշարը, որի մասնակից Հայաստանի միակ ներկայացուցիչը՝ Լեւոն Արոնյանն այս անգամ իր երկրպագուներին ուրախանալու առիթ չտվեց:
Չնայած 10-րդ տուրում Արոնյանը 1,5:0,5 ընդհանուր հաշվով («կույր» շախմատում՝ 1:0, արագում՝ 0,5:0,5) առավելության հասավ ռուսաստանցի Ալեքսանդր Գրիշչուկի նկատմամբ, սակայն գումարային մրցաշարային աղյուսակում առաջընթաց չունեցավ՝ 9,5 միավորով մնալով իններորդ հորիզոնականում:
Երեկ՝ եզրափակիչ տուրում Լեւոնի մրցակիցը կուբացի Լենյեր Դոմինգեսն էր: Միմյանց հետ խաղում էին նաեւ Գելֆանդն ու Իվանչուկը, Հաշիմովն ու Սվիդլերը, Կրամնիկն ու Կարյակինը, Պոնոմարյովն ու Սմիթսը, Գրիշչուկն ու Կարլսենը: Ի դեպ, նորվեգացի երիտասարդ գրոսմայստեր Մագնուս Կարլսենին, որն ամբողջ մրցաշարի ընթացքում կրնկակոխ հետապնդում էր Վասիլի Իվանչուկին, հաջողվեց նախավերջին տուրում կես միավորով շրջանցել ուկրաինացուն: Դա հնարավոր եղավ Ռուսլան Պոնոմարյովին երկու անգամ պարտության մատնելուց հետո:
