![\"\"](\"https://www.aravot.am/2010/aravot_arm/March/26/p16.jpg\")
Գերմանիայի կառավարությունը նիստ է գումարել, որը նվիրված է եղել կաթոլիկ եկեղեցու պատերի ներսում, նաեւ կրոնական կրթական հաստատություններում սեքսուալ բռնությունների դեպքերն ուսումնասիրելու համար հատուկ հանձնաժողով ձեւավորելու հարցին: Այդ մասին փոխանցել է «CBC News» գործակալությունը: Հանձնաժողովը կձեւավորվի Արդարադատության եւ Ընտանիքի գործերով նախարարությունների հովանու ներքո եւ պետք է սկսի աշխատել արդեն ապրիլի 23-ին: Հանձնաժողովի կազմում են լինելու եկեղեցու, կառավարության եւ կրթական հաստատությունների ու բարեգործական կազմակերպությունների 40 ներկայացուցիչներ:
ԳԴՀ կաթոլիկ ուսումնական հաստատություններում սովորող անչափահասների բռնաբարության՝ վերջերս տեղի ունեցած սկանդալային դեպքերի առնչությամբ ավելի քան 250 մարդ դիմել է իրավապահ մարմիններին, տեղեկացնելով, թե տարբեր տարիների ենթարկվել են սեքսուալ բռնությունների՝ ինչպես կաթոլիկ, այնպես էլ քաղաքացիական ուսումնական հաստատություններում: Սեքսուալ բնույթի հանցագործությունների մասին բացահայտորեն հայտարարելու կոչով գերմանացիներին դիմել էին իրենք՝ ԳԴՀ իշխանությունները դեռ այս տարվա հունվարին, երբ հայտնի էր դարձել, որ 1970-80 թվականներին «Canisius» ճիզվիտական քոլեջի առնվազն երկու ուսուցիչ սեռական հետապնդումների էր ենթարկել այդ հաստատության աշակերտներին:
Գերմանիայի կանցլեր Անգելա Մերկելը եւս հայտարարել է երկրի տարածքում գործող կրոնական հաստատություններում տեղի ունեցած սեքսուալ հանցագործությունների հետաքննությանը եւ տուժածներին փոխհատուցում վճարելուն խոչընդոտող օրենքի վերանայման անհրաժեշտության մասին:
