![\"\"](\"https://www.aravot.am/2010/aravot_arm/March/26/p15.jpg\")
Ֆրանսիայի նախկին վարչապետ Դոմինիկ դե Վիլպենը հայտարարել է նոր կուսակցություն ստեղծելու եւ այդ կուսակցության ղեկավարի պաշտոնում 2012թ. նախագահական ընտրություններին մասնակցելու իր մտադրության մասին: AFP-ի մատուցմամբ, նոր կուսակցությունը, որի անվան մասին ոչինչ չի հաղորդվում, դե Վիլպենի գլխավորությամբ պաշտոնապես կսկսի գործել 2010թ. հունիսից:
Իր որոշման մասին նախկին վարչապետը հայտարարել է մի քանի օր հետո՝ այն բանից, երբ աջ-պահպանողականների «Միություն՝ հանուն ժողովրդական շարժման» կուսակցությունը երկրում տեղի ունեցած տեղական ինքնակառավարման ընտրությունների ժամանակ սոցիալիստների դաշինքից ջախջախիչ պարտություն կրեց: Հիշեցնենք, որ դե Վիլպենը, ինչպես Ֆրանսիայի նախագահ Նիկոլա Սարկոզին, «Միություն՝ հանուն ժողովրդական շարժման» կուսակցության հայտնի գործիչներից մեկն էր: Նրանք երկուսն էլ արդեն վաղուց մրցակցում են կուսակցության ներսում լիդերություն ստանձնելու համար:
Աղբյուրի մատուցմամբ, առայժմ պարզ չէ, թե արդյոք դե Վիլպենի հայտարարությունը կարելի՞ է ընդունել որպես իշխող կուսակցությունը լքելու որոշում:
