Մարտի 27-ին, ժ. 20։30-ից 21։30-ը Երեւանում, ինչպես աշխարհի մի շարք քաղաքներում, մեկ ժամով կանջատվեն մայրաքաղաքի խորհրդանիշ հանդիսացող շենքերի արտաքին լուսավորությունն ու էլեկտրաէներգիան: Կանջատվի նաեւ քաղաքի պողոտաների ու հիմնական փողոցների լուսավորությունը։ Սա ոչ թե հովհարային անջատում է, այլ՝ մոլորակի կենսական պայմանների եւ ռեսուրսների պահպանմանն ուղղված ակցիա։
Այս միջոցառման կազմակերպիչը մեր երկրում Բնության համաշխարհային հիմնադրամի հայաստանյան մասնաճյուղն է (WWF), ՀՀ բնապահպանության նախարարությունը, Երեւանի քաղաքապետարանը եւ մի քանի այլ կառույցներ: Կազմակերպիչների ներկայացմամբ, «Մոլորակի ժամ» համաշխարհային ակցիան նպատակ ունի ներգրավել ավելի քան 1 միլիարդ բնակչություն՝ աշխարհի 6000 քաղաքներում։
Նշենք, որ այս համաշխարհային քարոզարշավն առաջին անգամ մեկնարկել է 2007թ. Ավստրալիայի Սիդնեյ քաղաքում, որտեղ 2 միլիոն մարդ անջատել էր լույսերը, որի հիմնական նպատակն է՝ միավորել մարդկության ջանքերը կլիմայի փոփոխության դեմ պայքարում։ 2008թ. ամբողջ երկրագնդում ավելի քան 50 միլիոն մարդ մասնակցել էր այս միջոցառմանը։ 2009թ. «Մոլորակի ժամ» ակցիային մասնակցել էր 1 միլիարդ բնակչություն՝ ավելի քան 4000 քաղաքներում։
