Բրիտանացի լրագրող Սեֆտոն Դելմերին ուղղված Ադոլֆ Հիտլերի նամակը, որտեղ վերջինս խոսել է Մեծ Բրիտանիայի եւ Գերմանիայի միջեւ «իրապես ջերմ հարաբերությունների» մասին, Լոնդոնում աճուրդի է հանվել: CNN-ի մատուցմամբ, աճուրդի կազմակերպիչները հույս ունեն այդ նամակը վաճառել 12 հազար ֆունտ ստերլինգով: Նամակը գրվել է 1931 թվականին, գերմանական նացիոնալ-սոցիալիստների առաջնորդ Հիտլերի՝ Գերմանիայի կանցլեր դառնալուց եւ այդ երկրի իշխանությունը զավթելուց 16 ամիս առաջ:
Ընդամենը մեկ էջանոց փաստաթղթում Հիտլերը հույս է հայտնել, թե Առաջին համաշխարհային պատերազմից հետո Եվրոպայում գոյություն ունեցող «ռազմական պսիխոզին» կփոխարինի երկու երկրների միջեւ բարեկամության հաստատումը: «Ես հավատում եմ, որ ճգնաժամը, որը հիմա թակում է մեր դռները, կարող է հաղթահարվել միայն սերտ համագործակցության ճանապարհով՝ այն պետությունների միջեւ, որոնք Եվրոպայում ուժերի բնական հավասարակշռության հաստատման մեջ են տեսնում այն համաշխարհային գլոբալ հիմնախնդիրների լուծման նախադրյալները, որոնցից այսօր տուժում է նաեւ Բրիտանիան»,- գրել է Հիտլերը:
1931-ին Սեֆտոն Դելմերը Բեռլինում բրիտանական «Daily Express» թերթի թղթակիցն էր: Համարվում է նաեւ, որ նա առաջին բրիտանացի լրագրողն էր, ում հաջողվել էր Հիտլերի հետ հարցազրույց անել: Նացիստների առաջնորդին նա այն ժամանակ նկարագրել էր որպես չափազանց հարդարված մազերով մի սովորական մարդ: Ժամանակակից բրիտանացի պատմաբանների կարծիքով, իր նամակում Հիտլերը ակնարկել է Մեծ Բրիտանիայի եւ Գերմանիայի միջեւ ընդհանուր շահերի առկայության մասին:
