Գազի սակագնի բարձրացման դեմ Հայ ազգային կոնգրեսի նախաձեռնած ակցիան կշարունակվի մինչեւ ամսվա վերջ: Այդ մասին Panorama.am-ի թղթակցին ասել է ՀԱԿ մամուլի քարտուղար Արման Մուսինյանը: Նրա խոսքով, արդեն իսկ 1800-2000 համահայցվոր պատրաստակամություն է հայտնել միանալ նախաձեռնությանը: Ապրիլի սկզբներին հայցը կներկայացվի վարչական դատարան, որտեղ ՀԱԿ-ը պահանջելու է չեղյալ համարել Հանրային ծառայությունները կարգավորող հանձնաժողովի (ՀԾԿՀ) որոշումը՝ գազի սակագնի բարձրացման վերաբերյալ: Մուսինյանն ասել է, որ ՀԱԿ-ում գոհ են համահայցվորների ակտիվությունից: Համահայցվոր կարող են լինել բոլոր այն քաղաքացիները, ում անունով կազմված է գազի օգտագործման պայմանագիրը։ Դրա համար անհրաժեշտ է ներկայանալ Հայ ազգային կոնգրեսի գրասենյակներ՝ ձեռքին ունենալով անձնագրի պատճենը, գազասպառման պայմանագրի երկու էջերի պատճենները (այն էջը, որտեղ երեւում են պայմանագիրը կնքող կողմերը, եւ այն էջը, որտեղ կողմերը ստորագրել են պայմանագիրը կամ պայմանագրի համարը):
