Նախկին գործարար Պարույր Գուլգուլյանի մասին հայաստանյան մամուլի հրապարակումները կարող են Գինեսի գրքում հայտ ներկայացնելու առիթ դառնալ:
![\"\"](\"https://www.aravot.am/2010/aravot_arm/March/23/p8.jpg\")
Գուլգուլյանը դեռ դատարաններում է եւ պնդում է, որ 53 000 ԱՄՆ դոլարի չափով իրենից գումար են հափշտակել՝ հրազենի գործադրմամբ ու անչափահաս երեխաներին առեւանգելու, վաղամեռիկ քննիչի ստորագրությունը փոխելու միջոցով: Դատական անհաշիվ նիստերի ժամանակ տրվում են բարձրաստիճան պետական այրերի անուններ, նախկին դատախազ Վլադիմիր Գրիգորյանն է դատարան կանչվում իբրեւ վկա, սակայն սայլը տեղից չի շարժվում: Նախկին դատախազը, ընդ որում, կանչվեց դատարան, որպեսզի պատասխանի, թե ինչու 2002թ. ապրիլին կարճվեց քրեական այն գործը, որն առաջադրվել էր որոշակի անձանց նկատմամբ:
Փողոցում հայտնված Պ. Գուլգուլյանը դիմել է ՀՀ վճռաբեկ դատարան ու ՀՀ հանրային խորհրդի նախագահ Վազգեն Մանուկյանին: Նա հայտնում է, որ իրեն նյութական վնաս են պատճառել նախկին համայնքապետ Արարատ Խրիմյանն ու նրա բարեկամ Սամվել Կարախանյանը: Այս վեճի հետ կապված՝ պարոն Գուլգուլյանը բազմաթիվ հանդիպումներ է ունեցել իրավապահ մարմինների հետ, սակայն, ինչպես տեղեկացնում է Հանրային խորհրդին. «ներկայացրածս փաստարկները չեն կարողանում հերքել՝ ստիպված լռում են: Իսկ ընդունել ինձ, դեռ չի նշանակում հարցի լուծում: Ես լռելու մտադրություն չունեմ, որովհետեւ գիտեմ, որ մարդ հարգանքի է արժանանում ոչ թե ահաբեկումով ու փողով, այլ՝ իր գործով»:
