«Էրդողանը հավանաբար պահի տակ դիմակը կորցրեց, եւ աշխարհը տեսավ, թե ինչ երկրի հետ գործ ունի»,- ԱԺ ճեպազրույցների ժամանակ այսպես մեկնաբանեց Թուրքիայում գտնվող հայերի հանդեպ Թուրքիայի վարչապետի սպառնալիքը ՀՅԴ խմբակցության ղեկավար Վահան Հովհաննիսյանը:
Պարոն Հովհաննիսյանը մտավախություն ունի, որ Էրդողանի այս սպառնալիքը որոշ տարրերի կողմից կարող է ընկալվել որպես հակահայկական գործողությունների ազդանշան. «Գիտենալով, թե ինչ հասարակության մասին է խոսքը, ես մեր հայրենակիցներին զգուշավորության կոչ կանեի, եւ եթե ունեն հնարավորություն, արագորեն Թուրքիայից դուրս կամ դեպի Հայաստան արագորեն ճանապարհ բռնեն»: Պարոն Հովհաննիսյանը կարծում է, որ Էրդողանի այս հայտարարությամբ բացվեց բոլոր նրանց աչքերը, ովքեր մինչ այժմ Թուրքիան ժողովրդավարական երկիր էին համարում: Ընդհանրապես, Թուրքիայի վարչապետ Ռեջեփ Թայիփ Էրդողանի հայտարարությունից՝ հայերին Թուրքիայից արտաքսելու մասին, դժգոհ են գրեթե բոլոր պատգամավորները: Ընդդիմադիր խմբակցությունները վստահ են, որ այս զարգացումները վտանգել են հայ-թուրքական արձանագրությունների վավերացման հարցը, իսկ կոալիցիայի անդամ քաղաքական ուժերի ներկայացուցիչները հակառակ կարծիքի են:
ՀՅԴ խմբակցության ղեկավարը վստահ է, որ Թուրքիայում իշխանությունները փոխվում են, բայց ձեռագիրը՝ ոչ: Էրդողանի հայտարարության առնչությամբ ԵԽԽՎ-ում հայաստանյան պատվիրակության փոխարինող կազմի անդամ Զարուհի Փոստանջյանը փաստաթուղթ է պատրաստում, որն ուղարկելու է ԵԽԽՎ բոլոր անդամներին եւ Եվրախորհրդի պաշտոնյաներին. «ԵԽ անդամ երկրի վարչապետը նման հայտարարություններով է հանդես գալիս, մինչդեռ ես կարող եմ նշել, որ Ստամբուլը՝ նախկինում Կոնստանդնուպոլիսը, ոչ միայն թուրքերի հայրենիք կարող է համարվել, այլեւ հույների, հայերի, ասորիների քաղաք, եւ նման արտահայտությունները, իհարկե, անընդունելի են եւ խախտում են ԵԽ կողմից ընդունված բազմաթիվ փաստաթղթեր»:
