Ֆուտբոլի Մակեդոնիայի ազգային հավաքականի գլխավոր մարզիչ Միրսադ Իոնուզը, որի ղեկավարած թիմը մայիսի 29-ին Ավստրիայում ընկերական հանդիպում է ունենալու Ադրբեջանի ընտրանու հետ, բացատրել է, թե ինչո՞ւ է ընտրությունը կանգնել հատկապես մեր հարեւան երկրի վրա: «Azerisport»-ին տված հարցազրույցում նա ասել է. «Գիտեք, որ Եվրոպայի 2012 թվականի առաջնության ընտրական մրցաշարում Հայաստանը մեզ հետ նույն խմբում է: Եվ մենք որոշեցինք խաղալ ձեր տարածաշրջանի որեւէ հավաքականի հետ: Հենց այս տեսանկյունով էլ Ադրբեջանն ընտրելը ճիշտ որոշում է»:
Հիշեցնենք, որ «Եվրո 2012»-ի ընտրական մրցաշարի «B» խմբում, բացի Հայաստանից ու Մակեդոնիայից, ընդգրկվել են նաեւ Ռուսաստանը, Սլովակիան, Իռլանդիան եւ Անդորրան:
