Երեկ լրատվամիջոցներում տեղեկատվություն էր տարածվել, թե Հայաստանի ըմբիշները չեն մեկնելու Բաքու, որտեղ ապրիլին կայանալու է ազատ եւ հունահռոմեական ոճերի Եվրոպայի առաջնությունը: Լուրի հավաստիությունը ստուգելու նպատակով կապվեցինք հանրապետության ըմբշամարտի ֆեդերացիայի 1-ին փոխնախագահ եւ գործադիր տնօրեն Հովհաննես Սոֆոյանի հետ եւ ստացանք հետեւյալ մեկնաբանությունը. «Մեր երկու ազգային հավաքականներն էլ դեռ շարունակում են ամենայն պատասխանատվությամբ նախապատրաստվել: Ինչ վերաբերում է մեկնել-չմեկնելուն, ֆեդերացիան դեռ վերջնականապես չի կողմնորոշվել: Հարցի պատասխանը հայտնի կլինի, հավանաբար, մինչեւ ամսվա վերջ, ինչի մասին հայ մարզասերներին անպայման տեղյակ կպահենք»:
