«Առավոտը» մարտի 4-ին «Կոթիում ադրբեջանցի է սպանվել» լուրով տեղեկացրել է, որ մեր բանակի ծառայողները ոչնչացրել են հարեւան հանրապետությունից անասնագողության նպատակով Հայաստան թափանցած խմբին: Անասնագողությամբ զբաղվող ադրբեջանական դիվերսիոն խմբի ոչնչացումից հետո Նոյեմբերյանի սահմանագոտու բնակիչները թեթեւացած շունչ քաշեցին, հուսալով, որ անասուններն այլեւս չեն հայտնվի Ադրբեջանի տարածքում: Սակայն այս անգամ էլ այլ խնդիր առաջ եկավ: Անցած շաբաթավերջին սահմանամերձ Բերդավանի գյուղի 20-ամյա բնակիչ Թաթուլ Երգենյանը, ով այդ օրն անասնապահ էր, տաքանալու համար մտել է մեր պաշտպանական դիրքերի խրամատները: Առանց հսկողության մնացած 28 գլուխ խոշոր եղջերավոր անասունը անցել է սահմանը եւ հայտնվել Ադրբեջանի տարածքում: Անասունների մի մասը պատկանել է Երգենյան ընտանիքին, մնացածը՝ համագյուղացիներին: Երգենյանների ընտանիքը համաձայնել է ժամանակի ընթացքում փոխհատուցել համագյուղացիների անասունների կորուստը:
