Օրերս «Առավոտում» նյութ էր տպագրվել այն մասին, որ «Երեւան ջուր» ընկերությունը հայտ է ներկայացրել Հանրային ծառայությունները կարգավորող հանձնաժողով եւ ուզում է խմելու ջուրը մայրաքաղաքում թանկացնել այն դեպքում, երբ որոշ թաղամասերում մատակարարում է ավազաջուր ու ժանգաջուր: Արձագանքելով հրապարակմանը՝ «Երեւան ջուր» ընկերությունից վստահեցրին, որ իրենք մայրաքաղաքի բնակիչներին մատակարարում են միջազգային որակին համապատասխան ջուր, իսկ եթե որոշ բնակարաններում ծորակից իսկապես ժանգաջուր է գալիս, դա տվյալ բնակչի ջրի խողովակների հնամաշ ու ժանգոտված լինելուց է, ինչը «Երեւան ջրի» հետ կապ չունի: Այդուհանդերձ, ընկերությունից խոստացան այցելել մեր նշած հասցեն ու ստուգել ջրի որակը: Ավելի ուշ «Երեւան ջուր» ընկերության առողջապահության, անվտանգության եւ բնապահպանության տնօրինության կողմից Սեբաստիա եւ Շահումյան փողոցների, Ծերենցի, Մանուկյան եւ Ջիվանու փողոցների մի քանի տներում ստուգումներ կատարելուց հետո ընկերությունից տեղեկացրին, որ «խմելու ջրի որակին ներկայացվող չափանիշներից եւ ստանդարտներից որեւէ շեղում չի արձանագրվել»:
