Պրոֆեսիոնալ մարզիչները սպորտում սեքսին տարբեր տեսանկյունից են նայում:
Մոտ երկու-երեք տասնամյակ առաջ թիմերի մեծ մասի համար մրցման նախորդ գիշերը սեքսով զբաղվել կտրականապես արգելված էր: Իբրեւ թե, ֆիզիկական եւ էմոցիոնալ էներգիան պետք չէ հենց այնպես վատնել: Օրինակ, Մուհամեդ Ալին մարտին նախորդող երկու շաբաթներին դադարեցնում էր կանանց հետ բոլոր տեսակի շփումները:
Այժմ մարզիչները բաժանվել են երկու բանակի՝ պահպանողականների, որոնք շարունակում են նախկին համոզմունքներին մնալ եւ առաջադեմների, որոնք ունկնդիր են գիտնականների կարծիքին: Իսկ գիտնականները պարզորոշ ասում են. «Սեքսի առումով անցկացրած լավ գիշերը չի ազդում ուժի, դիմացկունության եւ ֆիզիկական պատրաստվածության վրա»: Միակ բանը հոգեբանական գործոնն է: Մարզիկների մեծամասնությանը ամբողջովին ներդրվելու համար ագրեսիա է հարկավոր: Լավ սեքսը թուլացնում է ագրեսիվությունը եւ դրանով կարող է մարզիկին անգնահատելի օգուտ բերել: Սա Կանադայի սպորտային բժշկության ակադեմիայի նախագահ Իանա Շրիերի կարծիքն է: Իսկ իսրայելցի բժիշկ Օլշանսկին հավելում է. «Օլիմպիադա-96»-ում մենք համոզվեցինք, որ կանայք ավելի բարձր արդյունքներ էին ցույց տալիս, եթե մեկնարկից ոչ շատ առաջ օրգազմ էին ապրել: Խոսքը հատկապես վազորդուհիների եւ ցատկորդուհիների մասին է: Որքան մեծ է օրգազմը, այնքան մեծ է մեդալ նվաճելու հավանականությունը»:
Ի դեպ, ուսումնասիրելով նախորդի փորձը, Սիդնեյի օլիմպիական խաղերի կազմակերպիչները խաղերի մասնակիցների համար նախապես 130 հազար պահպանիչ էին գնել եւ հավաքածուի տեսքով դրանք նվիրում էին բոլոր մարզիկներին՝ յուրաքանչյուրին երեք հատ: Բայց, ինչպես հետո է պարզվել, դա էլ քիչ է եղել եւ շատերը էլի են գնել՝ ծախսելով ազնվորեն ստացած գործուղման գումարներից:
