![\"\"](\"https://www.aravot.am/2010/aravot_arm/March/13/p12.jpg\")
«Ալ-Քաիդայի» հետ կապեր ունեցած 26-ամյա ամերիկացի Շարիֆ Մոբլին, որն աշխատանքի էր տեղավորվել ԱՄՆ-ի ատոմակայաններում, կարող էր այդ կայաններում ահաբեկչական ակտեր կազմակերպել: «Newsru»-ի մատուցմամբ, նման մտահոգություն ունեն Մոբլիին Եմենում ձերբակալած ԱՄՆ հատուկ ծառայությունների ներկայացուցիչները, որոնք իրենց վարած հետաքննության ընթացքում պարզել էին, որ վերջինս աշխատել է Նյու Ջերսիի երեք ատոմակայաններում՝ մատակարարման եւ տեխնիկական սպասարկման ոլորտներում:
Մոբլին ձերբակալվել էր մարտին՝ Եմենի իշխանությունների կողմից «Ալ-Քաիդայի» անդամներին հայտնաբերելու նպատակով իրականացրած շուրջկալի արդյունքում: Իհարկե, Եմենի ոստիկանության պաշտոնյաներն առայժմ կապ չեն տեսնում Մոբլիի՝ ատոմակայաններում աշխատելու եւ Եմենում նրա ծավալած գործունեության միջեւ, բայց այդ վարկածի օգտին է խոսել Վաշինգտոնում այդ երկրի դեսպանության ներկայացուցիչ Մոհամեդ Ալբաշան:
