Իտալացի պաշտոնյաները, որոնք պատասխանատու են եղել 2009 թվականին Աքվիլում «Մեծ ութնյակի» գագաթաժողովի նախապատրաստման համար, հնարավորություն էին ստացել որպես շինարարական շահավետ պայմանագրեր կնքելու փոխհատուցում՝ օգտվել մարմնավաճառների ծառայությունից: Կոռուպցիոն այս սխեմային մասնակցել է 350 կին: «The Times»-ի մատուցմամբ, այդ մասին հայտարարել են փաստի առիթով հետաքննություն անցկացրած քննիչները: Վերջիններս նախապես համարել էին, որ այս գործում ներգրավված է ընդամենը 3-4 մարմնավաճառ, բայց ավելի ուշ «բարեհաճ վերաբերմունք՝ սեքսուալ ծառայությունների դիմաց» գործի ի հայտ եկած մասշտաբները նոր հարված են հասցրել Սիլվիո Բեռլուսկոնիի աջակենտրոն կառավարությանը: Հետաքննիչները հայտարարել են, թե գործի շրջանակներում հեռախոսային խոսակցություններ են գաղտնալսվել, որոնց արդյունքում նոր եւ այլ վկայություններ են ստացվել, որոնք ապացուցել են, որ կոռուպցիայի գործի հետ առնչվող կանայք, այդ թվում՝ ռուսներ, ուկրաինացիներ, վենեսուելացիներ, բրազիլացիներ, կուբացիներ եւ իտալացիներ, իրենց մատուցած ծառայությունների համար ստացել են մոտավորապես 700-ական եվրո՝ ամբողջ Իտալիայի տարածքով մեկ մասնավոր երեկույթների ժամանակ, նաեւ բնակարաններում կազմակերպված հանդիպումներին մասնակցելու համար: Որոշ դեպքերում մարմնավաճառների հոնորարը կազմել է մինչեւ 5 հազար եվրո:
Հիշեցնենք, որ «G8»-ի նախապատրաստական աշխատանքները եվրոպական երկրների հարկատուների համար արժեցել էր մի քանի հարյուր միլիոն եվրո:
