Հինգշաբթի գիշերը Ղազախստանում տեղի ունեցած ուժեղ ջրհեղեղը դարձել է բազմաթիվ ավերածությունների եւ մարդկային զոհերի պատճառ: «Ինտերֆաքսի» մատուցմամբ, փրկարարները երկրի գյուղերից միայն մեկում հայտնաբերել են 20 զոհի, մեկ այլ գյուղում շարունակվում են ջրի հոսանքի տակ հայտնված երկու մարդու որոնումները: Ալմա-Աթայում քանդվել է մի քանի ամբարտակ, հարյուրավոր բնակիչներ տարհանվել են, մեծապես դժվարացել, տեղ-տեղ նույնիսկ խաթարվել է ավտոճանապարհային երթեւեկությունը:
Միաժամանակ Աքսուսկի շրջանում, Կիզիլ-Աղաշ ջրամբարում, նաեւ անձրեւաջրերի կուտակման արդյունքում, ջուրն ամբարտակներից դուրս է եկել եւ ջրասույզ է արել համանուն գյուղը, որն ուներ երեք հազար բնակիչ: Ջրհեղեղը նաեւ մաքրել-տարել է Կիզիլ-Աղաշի կամուրջը: Ղազախստանի տրանսպորտի եւ հաղորդակցության նախարարությունից շեշտում են, որ արտակարգ իրավիճակ է ստեղծվել նաեւ Ալմա-Աթա- Ուստ-Կամենոգորսկ ավտոճանապարհին, որտեղ ջրհեղեղը ավերում է ճամփեզրերն ու երթեւեկելի հատվածը:
Երկրի նախագահ Նուրսուլթան Նազարբաեւը կարգադրել է հատուկ հանձնաժողով ձեւավորել եւ օգնել Ալմա-Աթայի՝ ջրհեղեղից տուժած բնակիչներին:
