ԲՀԿ նախագահ Գագիկ Ծառուկյանը «Շանթ» հեռուստաընկերության «Հեռանկար» ծրագրում անդրադարձավ հիմնականում տնտեսական խնդիրների եւ, պատասխանելով հարցին՝ որպես խոշոր գործարար՝ համամի՞տ է, որ տնտեսական ճգնաժամը փայլուն կերպով հաղթահարված է մեր երկրում (հիշեցնենք, որ նման կարծիք էր հայտնել էկոնոմիկայի նախարար Ներսես Երիցյանը), բավականին թափանցիկ քննադատեց նման կարծիք ունեցողներին: Ի պատասխան Նվեր Մնացականյանի հարցի, ԲՀԿ նախագահը հայտարարեց, որ նման կարծիք կարող է հայտնել միայն այն անձը, ով բացարձակապես չի տիրապետում իրավիճակին եւ տնտեսությունից ոչինչ չի հասկանում, եւ ենթադրություն արեց, թե գուցե այդ մարդկանց անձնական-ընտանեկան բյուջեն է մեծացել, եւ այդ պատճառով իրենց թվում է, թե ճգնաժամը հաղթահարված է: Հարկ ենք համարում նշել, որ պարոն Ծառուկյանի մտքերը բառացի չեն ներկայացված: Երեկ «Առավոտը» ԲՀԿ նախագահին մեկ հարց ուղղեց արտաքին քաղաքականության վերաբերյալ, եւ ի պատասխան՝ Գագիկ Ծառուկյանն ասաց. «Կայուն, անվտանգ եւ զարգացող տարածաշրջան ունենալու համար մենք կողմ ենք Թուրքիայի հետ բնականոն հարաբերությունների հաստատմանը: Սակայն մեր սկզբունքային դիրքորոշումը մեկն է՝ այդ հարաբերությունների հաստատումը պետք է լինի առանց որեւէ նախապայմանի: Թուրքիայի հետ դիվանագիտական հարաբերությունների հաստատումն ու սահմանների բացումը չպետք է պայմանավորված լինեն մեր ազգային գերակա շահերով: Ցեղասպանության խնդիրը չի կարող առեւտրի առարկա լինել, ԼՂ հարցը չի կարող նախապայման հանդիսանալ հայ-թուրքական հարաբերություններում: Սա՛ է մեր հստակ դիրքորոշումը: Ինչ վերաբերում է Ադրբեջանի առաջին դեմքերի կողմից պարբերաբար հնչող ռազմատենչ հայտարարություններին, ապա դրանց մենք պետք է հակադարձենք մեր տնտեսությունը հզորացնելով, պետք է հակադարձենք ուժեղ եւ հզոր պետություն կառուցելով, եւ այդ ժամանակ մեր դիրքերը բանակցային գործընթացում շատ ավելի ամուր եւ հզոր կլինեն»:
