«Կառուցողական» լինելու պատկերացումները՝ ըստ վրացի եւ հայ գործիչների
«Կառուցողական լինել, այսինքն՝ առկա խնդիրների մասին բարձրաձայն չխոսել եւ որոշ մարդկանց նման ասել, որ հայ-վրացական հարաբերություններում ամեն ինչ նորմա՞լ է». երեկ «Առավոտի» հետ զրույցում Հայաստանում Վրաստանի դեսպան Գրիգոլ Տավատաձեի՝ Մամուլի ազգային ակումբում արած հայտարարություններին այսպես արձագանքեց «Ջավախք» հայրենակցական միության նախագահ, ՀՀ ԱԺ պատգամավոր Շիրակ Թորոսյանը: Իսկ դեսպանը՝ պատասխանելով Շիրակ Թորոսյանի՝ Վրաստան մուտք գործելն արգելելու մասին հարցին, հայտարարեց, որ կիսում է իր կառավարության կարծիքը, եւ որ խնդիրը լուծում կստանա, երբ Շիրակ Թորոսյանը հանդես գա «կառուցողական դիրքերից»։ Շիրակ Թորոսյանն ասում է, որ կառուցողականը վրացական կողմի համար այն է, երբ իրենք Վրաստանի եւ ջավախահայության հետ կարողանում են վարվել այնպես, ինչպես կամենում են՝ դիսկրիմինացիայի ենթարկել, հալածել, ճնշել: Մինչդեռ, իր պատկերացմամբ՝ կառուցողական լինելու համար առկա խնդիրների մասին պետք է խոսել եւ փորձեր անել համատեղ ջանքերով դրանց լուծումներ տալու: «Հայ-վրացական հարաբերությունների վատացնողը նրանք են, ովքեր ջայլամային քաղաքականություն են տանում եւ այս կեղծ բարեկամության ջատագովն ու փառաբանողն են: Իրական բարեկամության համար կնճռոտ հարցերի իրական լուծումներ են պետք, այլապես մի գեղեցիկ օր այդ ամենը պայթելու է: Անհապաղ պետք է կանխել ջավախահայության նկատմամբ հալածանքները եւ ձուլումը, ու Ջավախքը կդառնա հայ-վրացական հարաբերությունների կապող օղակ: Ապակառուցողականն իրենք են, որ կողմնակից են ոչ իրական բարեկամությանը»,- ասաց Շիրակ Թորոսյանը: Անդրադառնալով իր՝ Վրաստան մուտք գործելն արգելելուն էլ, նկատեց. «Ոչ պաշտոնական աղբյուրներից ինձ տեղեկություններ են հասել, թե իբր իմ գործունեությամբ ես վտանգ եմ սպառնում Վրաստանի ազգային անվտանգությանը։ Ես հույս ունեի, որ դրանք պաշտոնական ձեւակերպումներ չեն, բայց Հայաստանում Վրաստանի դեսպանը կարծես թե պաշտոնական դիրքորոշում է հայտնել եւ ասել, որ կիսում է իր կառավարության տեսակետը։ Հասկանո՞ւմ եք՝ իրենք ծաղրում են մեզ»:
Խոսելով ջավախահայության խնդիրներից, մասնավորապես, Ջավախք հայկական գրականության մուտքի արգելքին՝ դեսպանը նշել է, որ գրականության մուտքն արգելված չէ, խնդիրը վերաբերում է դասագրքերին։ Ըստ նրա, Վրաստանի տարածքում Վրաստանի բյուջեից ֆինանսավորվում է 144 հայկական դպրոց. «Ես համոզված եմ, որ եթե մարդը ցանկանում է լիարժեք մասնակցել պետական կառավարմանը, իր մայրենի լեզվի հետ միասին պետք է իմանա այն երկրի լեզուն, որտեղ ապրում է»։ Հայկական Ս.Գեւորգ եկեղեցու առիթով էլ, որը վրացական իշխանությունները խոստացել էին վերանորոգել, Գրիգոլ Տավատաձեն նշել է, որ երկու երկրների մշակույթի նախարարությունների հետ բանակցություններ են տարվել եկեղեցին վերանորոգելու վերաբերյալ. «Այդ եկեղեցին անպայման վերանորոգվելու է։ Այդ հարցը մենք քննարկել ենք նաեւ հունվարին, ստեղծվել է հայ-վրացական միջկառավարական ժողով, եւ արձանագրության մեջ գրված է, որ այն վերանորոգվելու է։ Այս փուլում, որքանով տեղյակ եմ, աշխատանք է տարվում ֆինանսական հաշվետվության վերաբերյալ»: Ի հեճուկս պաշտոնական Թբիլիսիի նման հումանիստական հայտարարությունների՝ Շիրակ Թորոսյանն իր թիմակիցների հետ միասին շարունակում է պնդել, որ Վրաստանը չի կատարում իր իսկ կողմից ստանձնած միջազգային պարտավորությունները՝ կապված նաեւ ազգային փոքրամասնությունների իրավունքների պաշտպանության հետ:
