«Հարավկովկասյան երկաթուղին» (ՀԿԵՈՒ) ուսումնասիրում է Երեւանը Հրազդանի հետ կապող տակտային էլեկտրագնացքի գործարկման հնարավորությունը: Այս մասին երեկ տեղեկացրեց ՀԿԵՈՒ մամուլի ծառայությունը: Հարցը քննարկվել է նախօրեին՝ Քանաքեռ-Զեյթունի թաղապետ Արայիկ Քոթանջյանի եւ ՀԿԵՈՒ գլխավոր տնօրեն Շեւքեթ Շայդուլինի հանդիպման ընթացքում, Երեւանի գլխավոր ճարտարապետ Սերգեյ Դանիելյանի մասնակցությամբ: Քննարկվել է Երեւան-Հրազդան տակտային էլեկտրագնացքի գործարկման հնարավորությունը, որը կմեկնարկի Երեւանի «Ալմաստ» ավտոկայանից, եւ տեղում ուսումնասիրել են գծի այդ տեղամասի վիճակը: ՀԿԵՈՒ ներկայացուցիչների կարծիքով, նոր միջքաղաքային երթուղու գործարկումը թույլ կտա նվազեցնել տրանսպորտային ենթակառույցի ծանրաբեռնվածությունը եւ ստեղծել ոչ թանկարժեք այլընտրանք՝ ավտոմոբիլային ուղեւորափոխադրումների նկատմամբ:
