«Սոցիալական քարտը եւ նույնականացման քարտն իրարից տարբերվում են վերջինիս վրա չիպի առկայությամբ, որով քաղաքացիները կարող են էլեկտրոնային ծառայույթուններից օգտվել: Այն լինելու է բազմաֆունկցիոնալ»,- երեկ ասել է «Էլեկտրոնային կառավարման ենթակառուցվածքների ներդրման գրասենյակ» ԲԲԸ տնօրեն Արթուր Ղուլյանը: Նույն ասուլիսում Ոստիկանության անձնագրային եւ վիզաների վարչության պետ Նորայր Մուրադխանյանը տեղեկացրել է, որ այժմ համապատասխան օրենքը գտնվում է ԱԺ-ում, եւ «եթե կլինեն քաղաքացիներ, որոնք կրոնական կամ այլ նկատառումներով չեն ուզենա, որ նույնականացման քարտի վրա լինի սոցիալական համարանիշը, ինձ թվում է, որ օրենքը հնարավորություն կտա այդ քաղաքացիներին նույնականացման քարտն ստանալ առանց համարանիշի»: Նա չի մոռացել նշել, որ այսօրվա դրությամբ ՀՀ քաղաքացիների 97%-ն ունի սոցիալական քարտ: aysor.am-ի հարցին՝ թե նույնականացման քարտերի ներդրումից հետո սոցիալական քարտերը դո՞ւրս են գալու շրջանառությունից, Ն. Մուրադխանյանը պատասխանել է. «Կարելի է այդպես էլ ասել: Կգեներացվի ու համարանիշը կնշվի ե՛ւ կենսաչափական տվյալներով անձնագրում, ե՛ւ նույնականացման քարտում»: Հիշեցնենք, որ երբ 6 տարի առաջ ներդրվեցին սոցքարտերը՝ ծախսվեց 120 մլն դրամ:
