Այս տարվա հունվար-փետրվար ամիսներին Երեւան համայնքի բյուջետային մուտքերն ապահովվել են 92%-ով, այդ թվում՝ սեփական եկամուտների հավաքագրումը կազմել է 102%։ Այս մասին տեղեկանում ենք քաղաքապետարանի լրատվական կայքից: Մարտի 2-ին կայացած խորհրդակցության ժամանակ քաղաքապետ Գագիկ Բեգլարյանը հանձնարարական է տվել հարկային եկամուտների հավաքագրումն ավելի արդյունավետ կազմակերպելու վերաբերյալ։ Տրանսպորտի վարչության պետի զեկույցի համաձայն՝ մայրաքաղաքում կահավորված 330 կանգառասրահ կա, անհրաժեշտ է տեղադրել եւս 370-ը, հարցի վերաբերյալ առաջարկը քննարկվում է ճանապարհային ոստիկանության հետ։
«Երքաղլույս» ընկերությունը, ըստ այդ ընկերության տնօրենի, նորոգել ու թարմացրել է մալուխային ցանցի՝ ձմռանը վնասված հատվածը, շարքից դուրս եկած լապտերները փոխարինվել են նորերով։ Կոմունալ վարչության պետը ներկայացրեց գարնանային աշխատանքների ընթացքը. քաղաքապետի հանձնարարությամբ «Երեւան Ջուր» ընկերության կողմից շարունակվում են անձրեւատարների մաքրման աշխատանքները։
